Te'e k'iino'ob ku taaalo'oba

Múuch’óok’ot ti’ Nueva York ku táakapajal ti’ e’esajil wey Yucatáne’

Ts'íib yéetel oochel: Notimex
K'iintsil

Jo', Yucatán
VIernes 23 ti' septiembre, 2016

Jejeláas óok’otilo’ob ku beeta’al ka’ach úuchi, óook’ot ti’ le k’iino’oba’, paax xa’ak’tan yéetel jazz, soul yéetel contemporáneo, jayp’éel ba’alo’ob kun e’esbil tumen u múuch’óok’otil Compañía Eryc Taylor Dance ku taal ti’ Nueva York; ichil u cha’anil XVII Festival Internacional Avant Garde México 2016, yaan u beeta’al Jo’.

Ti’ le cha’anila’, yaan xan u táakpajal Escuela de Danzas ti’ u mola’ayil Instituto Municipal de Arte (IMA) ku taalo’ob ti’ u lu’umil Asunción, Paraguay, jo’olbesa’an tumen Katty Ortega.

Ti’ jump’éel k’a’aytaj tsikbalile’, Cristóbal Ocaña, máax jo’olbesik le Cha’ana’ tu ya’alaje’, ku kaxantiko’ob ka yanak kúuchilo’ob tia’al u ye’esa’al its’at ku beeta’al ti’ le k’iino’oba’.

Ti’ le yáax cha’anilo’ob ts’o’ok u beeta’alo’obe’, táakpaja’an aj its’ato’ob ku taalo’ob ti’ Taiwán, Corea, Francia, China, Japón, Inglaterra, Suecia, Suiza, Brasil, Croacia, Argentina, EE.UU, África, ichil uláak’o’ob.

Eryc Taylor, tu ya’alaj u ka’atéen u táakpajalo’ob ti’ le Cha’ana’; ba’ax ken u ye’eso’obe’, ku pa’axal yéetel ku yóok’osta’al tumen máaxo’ob ku taalo’ob ti’ Nueva York. K’a’abéetkunsa’ab u paaxil jazz yéetel soul, ku k’a’ayal tumen Nina Simone yéetel Billie Holiday.

Le múuch’ óok’oto’ yaan u ts’áak k’ajóoltbil jo’op’éel e’esajilo’ob ikil k’iimbesiko’ob lajun ja’ab káajik u meyaj.

X ma’ bo’olil u cha’anta’al; 24 yéetel 25 ti’ septiembre, tu súutukil 8 áak’ab, tu kúuchil Peón Contreras.