de

del

La Jornada Maya
Oochel Rodrigo Díaz Guzmán
K'iintsil

U noj lu'umil México
Martes 6 ti' junio, 2017

Ts’o’ok u máan jump’éel wi’inal yéetel uláak’ táanchúumuk uchik u káajal u xak’alta’al jejeláas meyajo’ob tu ketajuba’ob tia’al u náajaltiko’ob u ketlamil Premio Mujeres por México, beeta’an tia’al ko’olelo’ob ku meyajo’ob ti’ jump’éel mola’ay, tia’al u péektsilta’al u ki’imak óolil ko’olel.

“Táakbesa’ab maanal ti’ mil 800 altruistas, ba’ale’ yéeya’ab u meyajil Muñecas Melinas, ku meyajta’al ti’ Yucatán tumen Marelsy Castillo Ocampo, uchak u asab utschajal tu yich máak yo’olal u yutsil le meyajo’, u túumbenil yéetel ba’ax ku béeytal u beeta’al yéetel”, beey tu ya’alaj Nayeli Acevedo, aj k’a’aytajil ti’ Plaza de la Mujer, máaxo’ob patjo’olt chíimpolal.

“Muñecas Melinas u yóolil ko’olel!, tu ya’alaj Nayeli Acevedo, máax tu yalaje’, u meyajil Melinase’ ku kaxantik u ye’esik u jaajil u wíinkilal ko’olel, wa máax k’ubéentik. Te’elo’ ku meyaj Maresly Castillo, máax ku yáantik ko’olel tia’al u yaabiltikuba’ob je’el bix síijiko’obe’ yéetel u chíimpoltikuba’ob.

Lilia Gordillo, máax beetik u xk’a’aytajil ti’ MX 180, múuch’kabil kaxantik u péektsiltik jejeláas ba’alo’ob yaan ba’al u yil tia’al u yutsil kaaj, tu ya’alaj u chíimpolalil Premio Mujeres por México, jump’éel nojoch joolnaj tumen yéetele’ ku páajtal u k’ajóoltik meyaj ku beeta’al ma’ chéen tu kaajal, tumen ku k’ajóoltik uláak’ meyaj ku beeta’al ti’ táanxel lu’umo’ob ti’ Mëxico, ko’olelo’ob ku ts’áak u muuko’ob yéetel u yóolo’ob tia’al u jóok’olo’ob táanil sáansamal, le beetik tu ki’imak óoltaj tuláakalo’ob.
Yo’olal u meyaj Marelsy Castillo, tu náajaltaj 20 mil pesos tia’al u yáanta’al ma’ u ch’éensik u meyaj, tumen ya’ab ko’olel ku yáantik, ba’ale’ bejla’e’ táakmuk’ta’an tumen MX 180 yéetel Impulso Rosa.