Juan Manuel Contreras
Oochel Rodrigo Díaz Guzmán
K'iintsil
Jo', Yucatán
Miércoles 14 ti' junio, 2017
Bix u yilik máak tu paalil ba’ax u k’áat u ya’al ka síijik máak ti’ Yucatáne’, leti’ u nooyil u yáax jaatsil molts’íibo’ob yaan u jóok’sa’al ku k’aaba’tik [i]Mayab: Urdimbre de Identidades, [/i]jts’a’ab k’ajóoltbil tu ja’atskabil jo’oljeak tu kúuchil Salón de la Historia ti’ Palacio de Gobierno tu noj kaajil Jo’.
Te’e súutuko’ táakpaj u jala’achil u lu’umil Yucatán, Rolando Zapata Bello, láak’inta’ab tumen máax beetik rector ti’ Universidad Autónoma de México (UNAM), doctor Enrique Graue Wiechers, yéetel aj xak’al xook Mario Humberto Ruz Sosa, máax jo’olbesik Centro de Estudios Mayas ti’ Instituto de Investigaciones Filológicas ti’ UNAM, beyxan doctor Raúl Godoy Montañez, máax jo’olbesik Secretaría de Investigación, Innovación y Educación Superior, ichil uláak’ máako’on táakbajo’ob ti’ u meyajil le molts’íibo’.
Ti’[i] Mayab: Urdimbre de identidades[/i] yaan u ts’a’abal k’ajóoltbil junk’áal jaatso’ob bíin béeyak u xo’okolo’ob tumen je’el máaxake’, ba’ale’ ts’íibo’obe’ beeta’an tumen aj xak’al xooko’ob. U xookile’ yaan u páajtal u séeb na’atal, le beetik ma’atáan u ts’a’abal t’aano’ob ma’ k’ajóolta’ano’obi’.
Godoy Montañez tu tsikbaltaj bix úuchik u síijil u tuukul molts’íib. “jump’éel meyaj síij ich tsikbalil beetchaj yéetel jala’ach”, tu k’a’ajsaj, “táan k tukultik ba’ax je’el u páajtal k beetik tia’al k mu’uk’ankúunsik maaya miaatsil, tia’al beyo’ ma’ u ts’a’abal ba’ax ku tukulta’al tumen máaxo’ob xak’altik, ba’ax ku kaxanta’ale’ u ye’esa’al u noj ba’alil miaatsil ti’ máaxo’ob xíimbaltiko’on”.
