Paul Antoine Matos
Oochel Raúl Angulo Hernández
K'iintsil
Tekantó, Yucatán
Martes 20 ti' junio, 2017
Its’ate’ ku yokol tu ts’u’ u puksi’ik’al wíinik. Paaxe’ ku táats’máansik u jejeláasil tuukul ti’ política yéetel sociales, ku much’kíinsik wíinik tu bak’pachil yóok’ol kaab, ku p’itik pak’o’ob yéetel ma’atech u je’elel. Francia, Cuba, Guinea y México tsikbalnajo’ob uchak u much’kíinsikba’ob tu cha’anil El Festival de la Música, sábado áak’ab máaniko’, tu kaajil Tekantó.
U cha’anil paaxe’, tu béeykunsaj ba’ax ma’ yáax béeyak u beeta’ali’: tu biinsa’ajo’ob its’at ti’ kaaj, ti’ paalal, tu náachkunsajo’ob ti’ u K’íiwikil u noj kaajil Jo’.
Je’el bix [i]La Noche Blanca[/i], tuukul sijnáal ti’ Francia beey [i]Nuit Blanche[/i]. ts’o’okole’ jba’ab ti’ Jo’ tumen jo’olpóop máan táanil ti’ le yano’ob walkila’, beey uchik xan u beeta’al La Féte de la Musique, cha’an yáax beeta’ab tumen La Negrita, La Fundación Mezcalería yéetel Alianza Francesa, tu k’iinilo’ob u ja’abil 1982, uchik u patjo’olta’ab u beeta’al.
Kex tumen cha’an jbeeta’ab tumen Alianza Francesa, ma’ táakbesa’ab mixba’al yaan u yil yéetel u lu’umil gala; k’aaynaj Emiliano Buenfil, [i]La Chancil Tropical, Las hijas del rap [/i]yéetel uláak’ aj paaxo’ob ti’ le kaajo’.
Yéeya’ab Tekantó tia’al u beeta’al El Festival de la Música, tumen tu kúuchil La Fundación Mezcalería áantajaj jaytúul kajnáalo’ob te’elo’, le beetik tukulta’abe’ wa ka beeta’ak cha’an te’elo’, jump’éel bix u nib óolta’al máaxo’ob meyajnajo’ob te’elo’.
Paaxe’ káaj yéetel [i]DJ Tatto[/i], ba’ale’ tu súutukil u k’aay Emiliano Buenfil y [i]La Chancil Tropical[/i] beeta’ab u péek máax jok’a’ano’ob cha’an, tumen kex náach yaniko’obe’, jk’ucho’ob tak tu jach naats’il escenario.
Buenfil tu k’ayaj [i]Cabeza de cochino[/i], ich maaya. Ba’ale’ Las hijas del rap tu beetaj u náats’al táankelemo’ob uts tu xikin u yu’ubiko’ob rap, ichil uláak’ k’aayo’ob j-u’uya’ab te’e áak’abo’.
El Festival de la música tu ki’imak u yóol tekanteñoilo’ob, uchik u biinsa’al tu kaajalo’ob jump’éel ba’al jela’an yéetel ma’ suuk u yila’ali’.
