Katia Rejón
Oochel Raúl Angulo Hernández
K'iintsil
Jo', Yucatán
Viernes 22 ti' junio, 2017
Taatatsil ti’ 43 xoknáalo’ob ti’ Ayotzinapa, jk’ucho’ob tu yookbalil áak’ab jo’oljeak 24 ti’ junio, tu k’íiwikil Santa Lucía, tu’ux tu much’ajuba’ob yéetel aj beet balts’amo’ob, aj paaxo’ob yéetel aj ts’íibo’ob, tia’al u ye’esiko’ob u yáantaj ti’ u xíimbalil taatatsilo’ob. Te’e súutuko’ táakpaj kex 300 u túul máako’ob, tu’ux yanchajo xan Hermandad Normalista Rural, Movimiento Ciudadano, máaxo’ob táaka’ano’ob ti’ Morena, yéetel ti’ Sindicato de Telefonistas de la República Mexicana (STRM), beyxan Frente Popular Francisco Villa. Tu xíimbaltajo’ob u bejil 62, ts’o’okole’ k’éecho’ob ka jk’ucho’ob tu’ux yaan u mercado Lucas de Gálvez.
U k’uchulo’ob tak tu kaajil Jo’, tu tojoltaj 16 mil pesos, beey tu ts’áaj k’ajóoltbil Renán Enrique Polanco, juntúul ti’ le máaxo’ob táaka’an ichil meyajil yanchaj u beeta’al tia’al ka béeyak u k’uchulo’ob ti’ le noj kaaja’. J-A’alabe’, tu béeykunsajo’ob u much’kíinsiko’ob taak’in uchak u yáantalo’ob tumen uláak’ máako’ob. Taatatsilo’obe’ j-k’ucho’ob tu kaajil Hunucmá, tu’ux tséenta’abo’ob yéetel tu beetajo’ob jump’éel xíimbal líik’saj t’aan.
Tu xíimbalilo’obe’ tu yawatajo’ob “Kuxa’an biinsa’ao’ob, kuxa’an kk’áato’ob”.
