Juan Manuel Contreras
Oochel Comunicación OSY
K'iintsil
Jo', Yucatán
Martes 1° ti' agosto, 2017
Ruth Bennett yéetel u ki’ichkelemil juum u arpae’ yaan u jo’olbesiko’ob jump’éel súutukil paax jueves 3 ti’ agosto ku náats’ala’, tu kúuchil Teatro José Peón Contreras, tu’ux yaan u yu’ubal u paaxo’ob ts’íibta’an tumen Bach, Debussy, Fauré, Smetena yéetel Lara.
Le je’ela’ u yáax paaxil ti’ junjaats yaan u yantal ti’ le kúuchilo’, tu’ux yaan u táakpajal Orquesta Sinfónica de Yucatán (OSY), ba’ale’ jujuntúuli, máaxo’ob ku táakpajalo’obi’ yaan u paaxo’ob beey solistas, beey tu ya’alaj Miguel Escobedo Novelo, máax jo’olbesik Fideicomiso Garante ti’ Orquesta Sinfónica de Yucatán (Figarosy).
“Ts’o’ok u máan óoxlajunp’éel ja’abo’ob yanchajak OSY, ba’ale’, tuláakal máax ku táakpajalo’obe’ noj bej u xíimbaltmajo’ob tu juunalo’ob”, tu ya’alaj tu súutukil uchik u k’a’aytal le paax ku yantalo’, tumen ku kaxanta’al ka k’ajóolta’ak yéetel ka na’atak paax tumen je’el máaxake’.
Beey túuno’, Margarita Molina Zaldívar, máax jo’olbesik Patronato ti’ OSY, tu ya’alaj ki’imak u yóol yóok’olal le paax yaan u beetik Bennett tu kúuchil Peón Contreras, ts’o’okole’ tu k’a’anankúunsaj le meyaj táan u múul beeta’al yéetel OSY, tumen yaan u beetik u yantal uláak’ ba’alo’ob tia’al cha’antbil ti’ le noj kaaja’.
Tu súutukil u t’aan, Ruth Bennett tu ya’alaj ki’imak u yóol tumen yaan u páajtalil u paax ti’ jump’éel k’a’anan kúuchil je’el bix Peón Contreras. Beyxan tu ya’alaj jejeláas juumo’ob yaan u yu’ubal yéetel ku páa’tik ka béeyak u tsikbaltik jayp’éel ba’alo’ob yóok’ol le paaxo’ob ti’ le áak’abo’.
U náajalmaj jejeláas ketlamo’ob ti’ yóok’ol kaab, je’el bix Estados Unidos, Italia yéetel Mexico, solista yéetel aj paax británica tu ya’alaj noj ba’al u tia’al u paax, tumen máaxo’ob bin cha’antike’ uts tu yicho’ob arpa: “Jump’éel paax mantats’ ku nup’kíinsa’al yeetel ángeles, ba’ale’ tene’ taak in paax je’el bix juntúul kisin ti’ le áak’abo’”.
X paax, máax tu náajaltaj u yóox kúuchil ti’ u ketlamil The Dutch International Harp Competition, yéetel u paaxil Concierto de Aranjuez ti’ Joaquín Rodrigo, tu tsikbaltaj yaan ya’abach u jejejláasil u juumilo’ob ti’ jump’éel arpa, le beetik tu yáak’abil u paaxe’ yaan u yu’ubal u juum barroco, casicismo yéetel impresionismo.
