Ap
Oochel AP / Archivo
K'iintsil
Jueves 10 ti' agosto, 2017
U mola’ayil Disney yaan u káajsik u beetik streaming tia’al u béeytal u jatsikubáaj ti’ u cha’anil televisión yéetel online je’el bix Netflix, tia’al beyo’ u páajtal u ye’esik tuláakal u cha’anilo’ob.
Ti’ le mola’aya’ yaan u yantal u canalesil streaming tia’al u noj chíikulalo’ob je’el Disney yéetel Pixar, beyxan uláak’ jump’éel tia’al u cha’antal deportes. Beyo’, yaan u páajtal u náachtal ti’ u mola’ayilo’ob cable yéetel streaming tia’al u yantal u bota’al juntaats’ leti’.
[b]Ma’ sáasil yanik u káajbalili'[/b]
“Táan u xíimbalo’ob tia’al u paach k’iinil, ba’alo’ob ku tukulta’al yaanili’ u k’uchul u k’iinil u yúuchule’”, beey tu ya’alaj Brian Weiser, aj xak’al ti’ Pivotal Research Group. Ba’ale’ tu ya’alaj xan ma’ ojéela’an wa je’el u jóok’ol ba’al tu beel ti’ Disney.
K’a’anan ba’alo’ob je’el bix le je’elo’ le ken éemek u xookil jaytúul máak ku k’a’abéetkunsik canales ti’ cable tia’al cha’an, tumen ya’ab máake’ ku kaxtiko’ob uláak’ servicios mejentak yéetel ma’ seen ko’ojtako’obi’. Wa jump’íit máax ku cha’ane’, jump’íit máax xan ku k’áatik suscripciones, le beetik ma’ ya’ab taak’in ku náajaltik Disney. Ichil bolonp’éel winalo’obe’ táanil ti’ u yáax k’iinil julioe’, u xookil u canalesil cable’obe’ j-éem tu 13 por cientoil, wa ku ke’etel yéetel láayli’ le k’iino’ob je’elo’ ba’ale’ ti’ le ja’ab máaniko’.
Tia’al u ja’abil 2019, chéen tu aplicación Disney kéen béeyak u cha’anta’al ba’ax beeta’an tumen Disney wa Pixar, je’el bix Toy Story 4 yéetel Frozen. Beyxan yaan u páajtal u yila’al uláak’ cha’ano’ob úuchbentako’ob, yéetel ba’ax ku yila’al ti’ televisión je’el bix Disney Channel, Disney Junior yéetel Disney XD. U ya’abil le je’elo’obo’, paalal cha’antik.
[b]Na’ata’ab u jatspajal[/b]
Disney tu ya’alaj u xu’ulul mok t’aanil tu’ux ku ya’alik ku páajtal u yila’al u cha’anilo’ob ti’ Netflix, tu’ux éem xan u náajalil ka tu k’a’aytaj u jatsikubáaj. U mola’ayil Netflix walkila’ jach k’a’ananchaja’an tumen ku kaxantik u jóok’sik cha’ano’ob beeta’an tumen le mola’ay xano’.
Ku tukulta’ale’ Netflixe’ tu k’as líik’subaj tia’al u p’a’atal tumen Disney, ma’ seen úuch ku k’a’aytik u manik u yáax mola’ayili’: Millarworld, tu’ux ku beeta’al cómics yaan u beetik nu’ukbesajo’ob yéetel cha’ano’ob ch’a’aban ti’ le mola’ayo’.
Ku tukulta’al xane’ Disney je’el u ch’a’ak xan uláak’ nu’ukbesajo’ob, je’el bix superhéroes ti’ Marvel wa ti’ Star Wars tia’al u túumben app.
Máax beetik director ejecutivo ti’ le mola’ayo’, Robert Iger, tu ya’alaj táan u tukulta’al tumen Disney ka yanak jump’éel mokt’aanil yéetel Marvel beyxan Star Wars tia’al u k’a’abéetkunsa’al je’el bix u beetik Netflix.
