de

del

Ts'íib yéetel oochel Clara Huacuja
K'iintsil

Jo’, Yucatán
Jueves 10 ti’ agosto, 2017

Federación Internacional de Chi Kung para la Salud (CKS) tu jets’aj 13 agosto beey u máank’inal le especialidada’. U tuukulile’, ka béeyak u beeta’al noj meyajo’ob tia’al u ts’a’abal k’ajóoltbil tumen jump’éel ba’al táan u yáantaj tu toj óolal máak ti’ ya’abach noj lu’umo’ob, ts’o’okole’ k’a’anan tia’al u kaláanta’al ma’ u tsa’ayal k’oja’ano’ob.

Federación Internacional yanchaj tu ja’abil 2012, tu lu’umil Beijing, China, ikil u kaxanta’al u ts’a’abal k’ajóoltbil ba’ax Chi Kung. Mola’ayile’ ku much’kíinsik 90 múuch’kabilo’ob ku taalo’ob ti’ 33 noj lu’umo’ob ti’ jo’op’éel continentes. Tu lu’umil América Latina ts’o’ok u káajal u jach k’ajóolta’al ti’ lu’umo’ob je’el bix Argentina, Brasil, Bolivia, Perú, Cuba yéetel México, ba’ale’ táan u binetik meyaj tia’al u k’ajóolta’al je’el bix u tukulta’ale’.

Chi Kung para la Salud, úuch yanak, káaj ti’ ba’alo’ob suuk u beeta’al úuch ka’ach, ikil u kaxanta’al u ch’éensa’al ke’el ichil ya’abach máak, tu k’iinilo’ob ke’elil, le beetik ku ya’alal úuch yanak. Yéetel u máan k’iine’, ts’o’ok u ma’alo’obchajal u beeta’al, ku kaxanta’al ka péeknáak máak je’el bix u beetik juntúul ba’alche’ yéetel u jeets’elil ba’ax yaan ti’ yóok’ol kaab. U beeta’ale’, ku k’a’abéetkunsik u nojochtal u ch’a’ak u yiik’ máak, ku tojkúunsik wíinkilal máak, ku beetik u yáalkab k’i’ik tu beel, ku beetik u yantal muuk’ yéetel ku líik’saj óolal. Beey u ma’alobkúunsik u meyaj wíinkilal yéetel tuukul, tia’al beyo’ u yantal toj óolal.

Asociación Mexicana de Chi Kung para la Salud, táakpaja’an ti’ Federación Internacional, yaan u beeta’al tumen aj ka’ansaj Alfredo Fernández, máax jo’olbesik le múuch’kabilo’, jejeláas meyajo’ob ti’ jayp’éel noj lu’umilo’ob México. Tia’al u k’iinil domingo 13 ti’ agosto yaan u beeta’al tu kaajil Progreso, Yucatán, tu k’íiwikil Parque Morelos. Beyxan tu lu’umil Chetumal, Cancún yéetel u Noj Kaajil México, las 9 ja’atskab k’iin. Ku béeytal u táakpajal je’el máaxak u k’áate’.

Ku páajtal u yojéelta’al uláak’ ba’alo’ob ti’ Facebook: @Asociación Mexicana de Chi Kung para la Salud