Páayt’aan tia’al u k’iimbesa’al Tango de los tangos

U máank’inal La cumparsita

De la Redacción
Oochel Valentina Álvarez Borges
K'iintsil

Lunes 4 ti' septiembre, 2017

U meyaj ajpaaxo’ob ti’ le noj lu’uma’ yaan u páajtal u táakpajalo’ob ti’ Concurso Iberoamericano de Composición 100 años del Tango La cumparsita, máax ku náajale’ yaan u ts’a’abal ti’ dos mil dólares.

U mola’ayil Secretaría de la Cultura y las Artes (Sedeculta) ku páayt’antik u aj paaxilo’ob Yucatán tia’al ka táakpajako’ob ti’ ketlam múul beeta’an tumen Programa de Fomento de las Músicas Iberoamericanas (Ibermúsicas) yéetel Comisión Interministerial del Apoyo al Tango de Uruguay (CIAT).

U yóol paaxa’ jok’a’an ti’ jump’éel u meyajil Gerardo Matos Rodríguez, paax ch’a’aban beey u noj chíikulal tango, walkila’ táan u k’iimbesa’al 100 ja’abo’ob uchik u yantal.
Te’e ketlama’ yaan u táakbesa’al u paax ukp’éel noj lu’umo’ob tu’ux ch’a’aban u moots, Argentina, Brasil, Chile, Colombia, Costa Rica, Cuba, Panamá, Paraguay, Perú, México yéetel Uruguay.
Ichil ba’ax ku k’áata’al tia’al ka béeyak u táakpajal máake’, k’a’anan ka ka yanak ichil 18 tak 40 u ja’abil, chéen jump’éel u meyaj kéen béeyak u táakbesa’al, k’a’anan ka xáanchajak ichil waxak tak lajunp’éel minutos. Bix u beeta’al, bix u jejeláasil yéetel bix kéen p’áatake’ je’ek’ab tia’al beetbil je’el bixak ka u yóot máake’.

U ts’íibtik u k’aaba’ máake’ ku páajtal u beeta’al ti’ www.ibermusicas.org, 30 ti’ septiembre u ts’ook k’iinil u beeta’al. Wa ma’ tu páajtal u yokol máak tu kúuchil Internet, je’el u páajtal u t’aan máak yéetel máax p’aatal tu táan nu’ukbesaj tu lu’umil México, María Guadalupe García Villanueva, ti’ 01 (55) 1000 5600 extensión 4322, tia’al ka ts’a’abak áantaj.

Óoxtúul máak jach k’ajóolta’ano’ob yo’olal u meyajilo’ob tangoe’ leti’ob máax ken u xak’alto’ob yéetel yaan u yéeyiko’ob máax ku náajaltik ketlama’. Yaan u ts’a’abal k’ajóoltbil tu k’iinil 31 ti’ enero tu ja’abil 2018.

U yuumil paax kun yéeybile’ yaan u k’amik dos mil dólares. Ts’o’okole’, paaxe’ yaan u ts’a’abal k’ajóoltbil Uruguay tu winalil marzo ti’ le ja’ab ku taalo’, ichil u máank’inal 100 Años La cumparsita.