Óoxp'éel nuuktako’ob

Óoxp’éel chak ik’alo’ob sajbe’entsil tia’al Atlántico

Ap
Boonil LJM yéetel
K'iintsil

St. John's, Antigua
Jueves 7 ti' septiembre, 2017

Chak ik’al Irma tu jats’aj Caribe yéetel tuláakal u muuk’ miércoles máaniko’, tu jutaj najo’ob yéetel búul tuláakal kaajo’ob, ka’alikil u ch’a’ak bej tak Puerto Rico, República Dominicana, Haití, Cuba yéetel u noojolil Florida.

Leti’e yáax chak ik’al jach nojoch yéetel k’a’am ts’o’ok u yantal Atlántico, jmáan yóok’ol isla Barbuda, tu beetaj u búulul yéetel tu lúubsaj che’ob. Le beetik túuxta’ab ja’ yéetel janabe’enba’alo’ob tu islasil San Martín yéetel San Bartolomé, tumen tu lúubsaj tuláakal sáasil te’e kaajo’.

U jala’achilo’ob Guadalupe yéetel méek’tankaajo’obe’ tu ya’alajo’ob jump’éel metreo yáanal ja’ uchik p’áatal u estacionil tup k’áak’o’ob San Bartolomé, mix kis buuts’o’ob ku páajtal u jóok’olo’ob. Beyxan u u kúuchil San Martín óol laj k’askúunta’ab.

Kex tumen ma’ yanak máax kíimik yo’olale’, u xministrail Francia tia’al Territorios de Ultramar, Annick Girardin, tu ya’alaj “kch’a’ak sajakil yo’olal k-éet lu’umo’ob ma’ tu yóotajo’ob u’uy t’aan tia’al u kaláantikuba’ob yéetel ma’ j-bino’ob ti’ kúuchil ma’ sajbe’entsili’... táan k-líik’sikbáaj tia’al u jach k’aasil ba’al”.

U yáax ministroil Antigua y Barbuda, Gaston Browne, tu ya’alaj máan yóok’ol le kaajo’, u yutsile’ ma’ tu kíinsaj mixmáaki’, kex beyo’ tu ya’alaj chéen ts’o’ok u káajal u xak’alta’al bix uchik u p’áatal u kaajil Barbuda. K’aschaj k’áaxo’ob, ba’ale’ jala’acho’ob yéetel kaaje’ séeb péeknajo’ob tia’al u kaláantikuba’ob.
“To’on wey Antiguae’, t-k’amaj u asab k’a’amil chak ik’al yáan yanchaj Caribe, ts’o’okole’ ma’alo’ob t-beeaj”, tu ya’alaj yáax ministro.

11 ja’atskab k’iine’, chak ik’al Irmae’ ku péek yéetel 295 kilómetros ichil jump’éel hora, jach k’a’amkach ja’ ku beetik. U nooyile’ 110 kilómetros p’aatal tu lak’inil-nojol lak’in St. Thomas ti’ Islas Vírgenes, Estados Unidos yéetel 225 km tu lak’inil Juan, Puerto Rico. 26 kilómetros ichil jump’éel hora u séebanil u péek.
U kúuchil Centro Nacional de Huracanes, Estados Unidos, tu tukultaj u k’a’amil chak ik’ale’ yaan u p’áatal 4 wa 5 tak uláak’ ka’ap’éel k’iin.

Beey túuno’, miércoles máanik xano’, jóok’ uláak’ jump’éel chak ik’al tu ja’il Golfo de México, naats’ ti' u jáal ja’ilo’ob México. U k’a’amil iik’o’ob Katiae’ ku k’uchul tak 65 km ichil jump’éel hora, ts’o’okole’ táan u pa’atal ka u ch’a’a u muuk’ ti’ le k’iino’oba’. Ba’ale’ u noj kúuchil chak ik’alo’obe’ ku tukultik yaan u p’áatal ich ja’ tak tu sáasbal viernes.

Ka’ailike’, yanchaj José, u yóoxp’éelil iik’ tu ja’il Atlántico, yaan u sajbe’entsil u súutul chak ik’al, u k’a’amile’ náak tak 95 km ichil jump’éel hora. U chúumuke’ ti’ yaan ka’ach 2 mil 20 kilómetros tu lak’inil Antinillas Menores, táan u péek chik’in tu séebanil 20 kilómetros ichil jump’éel hora.