Carne y arena, ku chikbesik bix política ku ya'alik González Iñárritu

"Unaj u cha'anta'al tumen Trump"

Jorge Caballero
Oochel Barry Domínguez
K'iintsil

Jueves 14 ti' septiembre, 2017

Jump’éel ba’ax sáasil yaan ti’ ajbeet cine Alejandro González Iñárritu uchik u beetik u meyajil instalación yéetel realidad virtual, Carne y arena, leti’e ka béeyak u ye’esik bix yanik u kuxtal migrantes: “tumen wa kna’atik wa ba’axe’ ku páajtal kyaabiltik, wa ma’ táan kna’atike’ ma’ tu páajtal kbeetik mixba’al. Ich u meyajil Carne y arena, yaan u chíikulal política wa u yóotsilil u tuukul jump’éel partido, tumen u jaajil ba’ax ku kuxtatik juntúul wíinike’, ma’ chéen ch’a’abili’, ku píitmáan ti’ ba’ax ku tukultik jump’éel mejen kisin partido político. U yóolil in meyaje’ ku kaxtik ka béeyak u ye’esa’al ti’ máaxo’ob ma’ u k’ajóolo’obi’, bix u jaajil u kuxtul juntúul inmigrante, tia’al u múul xíimbalo’ob yéetelo’ob, tumen ma’atech u na’ata’al u jaajil u kuxtalo’ob”.

Ti’ jump’éel tsikbal tu beetaj máax jo’olbe’es u cha’anil 21 Gramos yéetel La Jornada tu ya’alaj: “Ts’o’ok u máan 15 ja’abo’ob kajlaken Estados Unidos, le ken kajlak máak Los Ángelese’ ma’ tu páajtal u púuts’ul máak ti’ ba’alo’ob yaan ba’al u yil yéetel migrantes. Cinco millones u túulo’ob, u ya’abilo’obe’ mina’an u ju’uno’ob, ya’abach talamilo’ob ku mánsiko’ob, ts’o’okole’ ku bin a k’ajóoltiko’ob, beey u yilik máak ya’abach ti’ leti’obe’ óoli’ chéen tu juun p’aatalo’ob. Yáax juntéen uchik u náats’al ti’ migranteso’obe’, leti’ ka tin beetaj u cha’anil Babel yéetel Adriana Barraza, tumen ya’abach ba’alo’ob tin xak’altaj yo’olal u xuul kaaj, beyxan yo’olal tsikbalo’ob tin wu’uyik tumen tu péeksaj in wóol. Ka jts’o’ok Biutiful, jach ja’ak’ in wóol yéetel inmigración ku yantal Europa, ti’ jump’éel nojoch kaaj je’ex Barcelona… je’el bix u ya’alik Alfonso Cuarón inmigrante’en de primera clase, ba’ale’ inmigrante’en, ts’o’okole’ jo’op’éel ja’abo’ob paachile’ tin káajsak in xak’altik jayp’éel ba’alo’ob yo’olal realidad virtual tumen taakchaj in beetik u xíimbal máak, ma’ chéen ka cha’anako’ob 3560 grados; in k’áat ka xíimbalnako’ob yéetel ka u yu’ubo’ob u xíimbalo’ob yóok’ol saam. Ba’ale’ te’e k’inako’obe’ ma’ yanak túumben ba’alo’ob ts’áak u páajtalil u beeta’ali’, le beetik ka tin ts’o’oksaj El Renacido, tin tsikbaltaj ba’ax kin tukultik yéetel Emmanuel Lubezki, ba’ale’ xanchajo’on jump’éel ja’ab tia’al kna’atik bix je’ek u páajtal kbeetik”.

Beey túuno’, González Iñárritu tu tsikbaltaj xan: “Ichil ka’ap’éel tuukulo’ob chukbesj meyaje’, je’ets’ k’a’anan u beeta’al de áak’ab, tumen ku yáantiko’on kchukbes ba’ax ma’ tu páajtal kbeetik yéetel ku beetik u yu’ubik máak talam bix yanik; jach noj ba’al le ka’ap’éel ba’alo’oba’. Jo’op’éel ja’abo’ob paachil káaj kkuxtatik talamilo’ob táan kmáanisko’ob walkila’”.

Ka jk’e’ex ba’ax ktsikbaltike’ ajbeet cine tu ya’alaj: “Mantats’ k-u’uyik etnonacionalistaon, jump’éel ba’ax ku péech’óolta’al Estados Unidos, kex tumen lu’umo’ob Costaso’obe’ táan u bin u jóok’olo’ob táanile’, u k’íiwikil noj lu’ume’ táan u jelbesik bix u tuukul, le beetik ts’o’ok u k’as áantaj tia’al ka yéeya’ak juntúul sak wíinik u beet u jala’achil le lu’umo’... inmigrante’en, ts’o’okole’ kaja’anen ti’ jump’éel noj kaaj tu’ux ya’ab inmigrantes yano’obe’, mantats’ u yu’uba’al u yóol péech’óolal ti’ ya’abach jaatslu’umo’ob Estados Unidos, je’el bixake’ ku yu’uba’al péech’óolal, ku yaatal tin wóol ba’ale’ jach naast’ yanik. Kex ka’atéen ts’o’ok in máansik su’utsil ba’alo’ob. Ba’ale’ u jach ma’alo’obil inmigrante yaan yóok’ol kaabe’, mexicano”.

Yo’olal u meyajil instalcióne’, máax jo’olbesik u cha’anil Birdman, tu ya’alaj: “Yéetel u meyajil Carne y arena kin kaxtik in beetik its’aj yéetel u yáantajil túumben ba’lao’ob tia’al u ye’esa’al bix u kuxtal wíinik. Mix juntéen tin tukultaj wa je’el u péek u yóol politítico’ob; ma’ táan ka’ach in meyajtik ya’abach k’iino’ob tia’al in we’esik ba’ak kin tukultik, tumen mexicanoen, wíiniken yéetel aj-its’aten. Asab ma’alo’ob ka’ach in ts’íibtik wa ba’ax wa in jóok’ol tsikbal yéetel in éetajilo’ob. Ku asab náachtal u yóolil le meyaj tin beetaja’, ma’ in wojel wa yaan in béeytal wa ma’, ba’ale’ beora’ núup’ yéetel ba’ax ku yúuchul ti’ política, le beetik ku chikpajal beey jump’éel ba’al beeta’an tia’al u yaktáanta’al, ba’ale’ ma’ beyi’. Beye u chikpajal ba’ax ku ya’alik Ai Weiwei, yo’olal talamil yaan ti’ wíinik yóok’ol kaab… jump’éel ja’ab paachile’ binen xíimbal Catania, Sicilia yéetel in láak’o’ob, ka tin k’áatchi’itaj ya’abach máako’ob, ti’ tin wilaj óoli’ juntáakalili’ ba’ax ku tsikbalta’ali’, juntáakalili’ ba’ax beetik u jóok’ol máak táanxel lu’um; beey in wóol chéen yéetel entroamericanos yéetel mexicanos kin tsikbale’. Yéetel Carne y arena, tene’ kin we’esik migracióne ma’ chéen jump’éel talam máansik chéen mexicanos, jump’éel ba’al ku yúuchul yóok’ol kaab, le beetik tu chúumukil instalacióne’, yaan jump’éel chíimpolal tia’al africanos”. Beyxan tu tsikbaltaj: “Yaan xan uláak’ ka’ap’éel instalaciono’ob Carne y arena, tu kaajil Milán yéetel Los Ángeles, jach ma’alo’ob táan u k’a’amal tumen máak, tumen le ken béeyak u na’atal tumen juntúul periodista wa políticoe’, yáax na’atan tumen wíinik, tumen je’el bix chéen tu juunal máake’, chéen ti’ leti’ ku p’áata’al ba’ax ku yu’unik wa ku tukultik yo’olal Carne y arena. Jach ku péeksik in wóol in wilik bix u yilik wíinik in meyaj. Tumen ba’ax ku yu’ubik máake’ ma’ táan u tuus, táan u xíimbal máak yóok’olo’ob, u yook máake’ táan u pe’echatiko’ob u saamil desierto… tuláakal ba’ax táan u ya’alik tech jaaj, jump’éel ba’ax kuxkíinsa’ane’, ma’ chéen jump’éel tuukuli’, kuxkíinsa’an”.

Alejandro González je’el u beetik ka cha’anta’ak Carne y arena tumen Trump yéetel uláak’ políticos ti’ México: “Táan ktsikbal yo’olal u kuxtal wíinik, ba’ale’ beey chéen yo’olal kóochak wóol ku tsikbaltik máake’. Ma’ jump’éel ba’al chéen ch’a’abili’, jump’éel ba’al jaaj ku máansik inmigrantes, yéetel ku beetik u péek u yóol máak tia’al u na’atal kuxtal, beyxan ku beetik ktukultik ba’ax je’el u páajtal kbeetik tia’al u ch’éenel le talamila’”.

Instalación Carne y arena yaan u páajtal u cha’anta’al tu kúuchil Centro Cultural Universitario Tlatelolco, tu k’iinil 18 ti’ septiembre, beyxan ku páajtal u xak’alta’al u kúuchil Internet carneyarenatlatelolco.com.