Yéetel u doodleil, Googlee’ ku k’a’ajsik yukateka Elvia Carrillo Puerto

Uchak u máak 139 ja’abo’ob síijik

Katia Rejón
Boonil ch'a'aban web
K’iintsil

Jo', Yucatán
Jueves 7 ti’ diciembre, 2017

Jo’oljeak miércolese’, u kúuchil kaaxan Google, ti’ Internet, tu ts’áaj tu boonil u chíikulal ku k’aaba’tik doodle x péektsil sijnáal México, Elvia Carriilo Puerto, máax ba’atenaj yo’olal u páajtalilo’ob ko’olel, uchak u máak 139 ja’abo’ob uchik u síijil.

Tu yáax wáale’, j e’esa’ab juntúul ko’olel máax péektsiltik ka béeyak u táakpajal uláak’ ko’olelo’ob ti’ yéeytambalil, boone’ j beeta’ab tumen x boonil sijnáal tu noj kaajil México, Hilda Palafox, ti’al u chíimpolta’al u meyaj Cariilo Puerto yéetel ti’al u nojba’alkúunsa’al tuláakal meyaj tu beetaj yo’olal ko’olelo’ob, ti’al ka yanak keetil kuxtal uti’alo’ob.

Tu blogil, u mola’ayil Mountain View ts’íibta’ab Elvia Carrilo Puertoe’, síij tu lu’umil Yucatán tu ja’abil 1878, j pa’at u k’aaba’ beey La monja roja, uchik u péektsiltik u tuukul ko’olel ti’al ka táakbesa’ak ich u políticail México, ti’al u káajbal u sigloil XX.

Xooknaj yéetel x k’aay tuukul Rita Cetina Gutiérrez, máax tu ka’asaj ti’ jayp’éel ba’alo’ob yo’olal keetil kuxtal ichil xiib yéeel ko’olel, tu patjo’oltaj múuch’kabilo’ob ku péektsiltiko’ob feminismo, je’el bix le ku k’aaba’tik Liga Rita Cetina Gutiérrez, tu’ux ku beeta’al tse’eko’ob yo’olal u toj óol ko’olel yéetel u k’a’ananil ka táakbesa’ako’ob ichil jala’achil.

Tu kaajal, Yucatáne’, tu yáantaj ko’olel ti’al ka u táakbesuba’ob ti’ yéeytambalo’ob yéetel ti’al ka káajak u meyajo’ob ti’ kúuchilo’ob jo’olbesa’an tumen jala’achil, ti’al u ja’abil 1923 yéeya’ab ti’al u beetik u diputadail yéetel uláak’ ka’atúul ko’olelo’ob Beatriz Peniche yéetel Raquel Dzib Cícero, yo’olal u múuch’kabil Partido Socialista del Sureste.

“U meyaje’ jach yaan u chíikpajal le ken káajak u t’aan máak yo’olal bix uchik u káajal u táakbesa’al ko’olel ich yéeyajil tu noj lu’umil mexico ti’al u ja’abil 1953”, ts’íibta’ab tumen u kúuchil kaaxan.

Uchik u kíinsa’al u suku’un Felipe Carrillo Puerto, ka’alikil táan u beetik u jala’achil u noj lu’umil Yucatáne’, j ch’éen u beetik u diputadail, ka’aj j bin kajtal tu Noj Kaajil México, tu’ux tu káajsaj u mola’ayil Secretaría de Agricultura la Liga Orientadora Femenina Socialista, kúuchil tu’ux ku yáanta’al x ch’úupalal p’aata’ano’ob wa x ch’úupalal chéen tu juunal ku líik’sik u paalal, ts’o’okole’ paach k’iine’ tu sutaj beey Liga de Acción Femenil, tu’ux ba’ate’enaj ti’al u chíimpolta’al u yéeytambal ko’olel.

Elvia Carrillo Puerto j kíim tu noj kaajil México tu k’iinil 15 ti’ abril ti’ u ja’abil 1968. 90 u ja’abil.