Maaya t'aane' tu péeksaj u yóol máax ku báaxal ti'al u beetik u jala'achil

Katia Rejón
Oochel Rodrigo Díaz Guzmán
K'iintsil

Miércoles 13 ti' junio, 2018
Jo', Yucatán

Jach u tich’maj u xikino’ob candidatos ka’alikil u yu’ubiko’ob bix kéen úuchuk báaxal. Fabrizio León, máax jo’olbesik u pik’il ju’unil La Jornada Maya ku tsikbaltik bixi, yéetel u yóoxtúulalo’ob ichil ki’iki’ óole’ tu yu’ubajo’ob yéetel tu k’áatajo’ob jayp’éel ba’al. Walkila’, chéen junk’aal k’iino’ob ku binetik ti’al u yantal yéeytambal, ba’ale’ beey ts’o’ok u suuktal ti’ob u ketikuba’ob.

Kex tumen kantúul u candidatoilo’ob ti’al u yéeya’al máax bíin u beet u jo’olpóopil u noj kaajil Jo’e’, juntúule’ Tina Tuyub ti’ u múuch’kabil PRD ma’ táakpaji, ba’ale’ uláak’ óoxtúulo’obe’ Víctor Caballero Durán ti’ PRI, Renán Barrera Concha ti’ PAN yéetel Fernando Xacur ti’ Morena k’ucho’ob te’e súutuko’.

Tu’ux kulaj periodista’ob máaxo’ob beet k’áatchi’obe’, ti’ yaan Yazmín Rodríguez, máax jo’olbesik Desde el balcón; José Palacios Tepate, máax jo’olbesik Reporteros Hoy; María Briceño, ti’ La Jornada Maya; yéetel periodista Eduardo Lliteras.

Máax ja’ajatsik t’aan, Fabrizio León, tu yáax a’alaje’ periodismoe’ unaj bin jump’éel ba’al ma’ chéen ch’a’abil u beeta’ali’, tumen u jaajile’ ma’ beyo’. Le beetike’, ti’ jump’éel múuch’tsikbal beeta’ab yéetel jo’olbesa’ab tumen periodista’obe’ u jach k’a’ananil ba’ale’ leti’e’ k’áatchi’obo’.

Ichil tsikbal jbeeta’abe’ ch’a’ach’ita’ab ba’alo’ob yo’olal ba’alo’ob ma’ sáasil u beeta’al ichil jala’ach, bix u péek máak ti’ kis buuts’ yaan tu noj kaajil Jo’, náaysaj óol, ichil uláak’ ba’alo’ob.

Ba’ale’, k’uch uláak’ jun súutuk tu’ux k’áatchi’itnaj tuka’atéen candidatos tumen La Jornada Maya, u x editorail K’iintsil, Sasil Sánchez, t’aanaj ich maaya ba’ale’ ma’ tu k’ext’antaji. Mix máak na’atik, máaxo’ob yano’ob te’elo’, kex 50 máak cha’antik ba’ax táan u yúuchule’, ma’ xan táan u t’aano’ob.

Ma’ sáame’ Sasil Sánchez ku ya’alik ich káastelan: ¿Qué van a hacer cuando pase exactamente esto? ¿Cuando alguien llegue a una dependencia municipal, hable en maya, y no le entiendan? ¿Qué acciones van a tomar para el posicionamiento de la cultura maya en la ciudad?

Fernando Xacur ti’ Morenae’ tu chíimpoltaj k’áat chi’ beeta’ab yéetel bix úuchik u beeta’ale’ tu béeykunsaj ba’ax u k’áat, u chikbesik talamil ku yantal le ken k’uchuk juntúul wa máax t’anik maaya yiknal máax chéen kastelan u t’aan yéetel chéen leti’ suuk u yu’ubal.

“K p’íitkunsmaj maaya miatsil. Jump’éel ba’al k’a’anan u meyajta’al, ti’ Ayuntamientoe’ unaj u yantal máak t’anik maaya ti’al u k’a’amal je’el máaxak bíin taak. Unaj kts’áak k’ajóoltbil ba’alo’ob ich maaya”, ku ya’alik.

Renán Barrera tu ya’alaj tuukul yaan ti’al u beeta’al Instituto Municipal de Fomento a la Cultura Maya, ka’alikil Víctor Caballeroe’ tu ya’alaj unaj u yantal meyaj ti’al “u táakbesa’al tuláakal máak” ichil kuxtal sáansamal.

Ti’al u ts’ook k’áatchi’ob beeta’abe’, chéen yanchaj u núukiko’ob wa beyo’ wa ma’, yo’olal ba’alo’ob je’el bix wa unaj u su’utul carnaval tu kaajil Jo’; k’áata’ab wa unaj u suut ja’ ti’ le kaaja’ yéetel u ts’ook ka’ap’éelo’obe’ yo’olal kis buuts’ yéetel wa unaj u ch’éenel u yokol kis buuts’o’ob tu k’íiwikil Jo’.
Ichil redes sociales, máaxo’ob táakpajo’obe’ tu papaxk’a’abtajo’ob le súutukilo’ tumen candidato’obe’ ma’ tu kaxtajo’ob ba’al u ya’alo’ob ka tu yu’ubajo’ob u k’áatchi’italo’ob ich maaya.

Beyxan yaan máaxo’ob ku t’aano’ob uts yo’olal u candidato’ob. Maanal ti’ 3 mil 500 k’uben t’aano’ob yanchaji yéetel 13 mil máako’ob cha’antej, leti’ob máax bíin u yéeyo’ob tu yáax k’iinil julio, máax ken u beet u jala’achil u noj kaajil Jo’.

Tu ts’ooke’, jtse’el u pixib ch’enebo’ob, sáasile’ léembanaj tu paach jump’éel naj tu’ux ku bin u t’úubul k’iin. Ts’o’ok tsikbal, Fabrizio León ku ts’íiboltik uts ti’ tu yóoxtúulalo’ob, candidato’obe’ líik’o’ob ka jo’op’ tak u tsikbal ichilo’ob, ku che’ejo’ob. U ma’alo’obil yéetel u k’aasil ba’ale’, ts’o’ok u máan.