Ku líik'sa'al k'ajla'ay yéetel u cha'anil le k'iino'obe'

E'esajile' yaan u ts'áak cha'ano'ob mix juntéen yáax ila'ak

Ana Mónica Rodríguez
Oochel Fotograma
K'iintsil

Viernes 14 ti' septiembre, 2018

Cha’an beeta’ab walkil 50 ja’abo’ob paachil tu yóok’olal u péeksajil xoknáalo’ob yanchaj tu ja’abil 1968e’, jump’éel ba’ax líik’sik k’ajla’ayil yanchaj te’e k’iino’obe’, beey úuchik u je’ets’el tumen cineasta Óscar Menéndez, máax jach táakpaj te’e k’iinako’obe’, tumen xooknaj Universidad Nacional Autónoma de México (UNAM).

Menéndez máax yaan u beeta’al jump’éel chíipolal ti’ ichil Arcadia, primera edición de la muestra internacional de cine rescatado y restaurado, yaan u yúuchul ichil 25 tak 30 ti’ septiembree’, tu ya’alaj beya’: le múuch’tambala’ noj ba’al tumen u líik’smaj ba’alo’ob mix juntéen yáax chikbesa’ak; ts’o’okole’, óoxp’éel cha’an in beetmaje’ yaan u ye’esa’al tumen ts’o’ok chúumuk siglo ma’ ka’a ts’a’abak cha’anta’ali’.

Tu ya’alaje’: “Te’e’ k’iino’obe’, ichil u múuch’il xoknáalo’one’ t beetaj jump’éel yáax documental –yachaj 40 u yoochel– yóok’olal bix úuchik u péek xoknáalo’ob, t beetaj jump’éel ba’al beey noticiero, káaj tu winalil agosto. Jump’éel páayt’aan ti’al u núup’ul kaaj t éetel.

Te’elo’ k tsolik jejeláas ba’alo’ob yaan u yil yéetel le wakp’éel ba’alo’ob ku k’áata’al ti’ Consejo Nacional de Huelga yéetel t ts’íibtaj ba’ax t tukultaj je’el u páajtal u k’e’exel ti’ jala’achil, tu yóok’olal ba’ax jets’a’an ichil u jaatsts’íibil 39 ti’ U Almejen Noj A’almajt’aanil U Múuch’ Péetlu’umilo’ob México”.

Sáasil yanik, u péeksajil xoknáalo’obe’ jach jeets’el bix u péek ts’o’okole’ meyaj ku beeta’al ichil u jaatsilo’ob jóok’sa’ane’, tajan ma’alo’ob. Yaan u jaatsil meyajo’ob, je’el bix le k’aaba’inta’an Marilyn Monroe, jóok’ ti’ Facultad de Ciencias Políticas, tu’ux táakpaja’an aj k’aay tuukulo’ob, máaxo’ob ku k’a’am a’aliko’ob revolucionario xookil ti’ jejeláas kúuchilo’ob; jump’éel ba’al jach suuk u beeta’al, ka’alikil jala’ache’ yéetel ts’oon ku núukik to’on ba’al.

Ki’imak óolal xo’ot’ tumen k’aasil ba’al

Péeksajil xoknáal yanchaj tu ja’abil 68e’, ku ya’alik Menéndez, leti’e’ democrático cha’an xo’ot’ tumen k’aasil ba’al yanchaj 2 ti’ octubre yéetel u jala’achil Gustavo Díaz Ordaz.

Ka’alikile’, Hugo Villa Smythe, máax jo’olbesik filmoteca ti’ le noj najil xooko’, tu tsikbaltaj: Cha’anilo’ob beeta’an tumen Menéndeze’ j beeta’ab tu bak’pachil noj péeksajil yanchaj, meyajnaj beey jump’éel kúuchil k’a’aytik péektsilo’ob; ka j ts’o’oke’ kaxta’ab u tsikbalta’al ba’ax úuch tumen máaxo’ob k’a’alo’ob Lecumberri yéetel tu ts’ooke’ láayli’ tu kaxtaj u yojéeltiko’ob ba’ax úuch ka’aj máan u kíinsajil Tlatelolco.

Tu ye’esajil Arcadiae’, x ma’ bo’olil tuláakal ba’al bíin beeta’aki’, ts’o’okole’ yaan u ts’a’abal cha’antbil jayp’éel cha’ano’ob yáax juntéen u ye’esas’al, yaan u yantal cineconciertos, e’esajilo’ob, yaan u ts’a’abal k’ajóotbil áanalte’ob yéetel cha’ano’ob ti’ u kúuchil Plaza de las Tres Culturas, tu k’iinilo’ob 29 yéetel 30 ti’ septiembre, tu súutukil 8:15 áak’ab, yéetel El Grito, beeta’an tumen Leobardo López Arretche, yéetel Olimpia, beeta’an tumen José Manuel Cravioto.

U nooyil e’esajile’ leti’ u k’iimbesa’al 50 ja’abo’ob ti’ u péeksajil xoknáalo’ob, je’el bix xan u xak’al tuukul uláak’ ba’alo’ob úuch ti’ le k’iino’obe je’elo’ tu noj lu’umil México yéetel uláak’ táanxel lu’umo’ob. Ichil le 40 u p’éel cha’anilo’ob yane’, táaka’an jayp’éele’ ma’ yáax cha’antako’obi’, beyxan uláak’o’ob jóok’sa’abo’ob yéetel utskíinsa’abo’ob úuchik u ch’a’abalo’ob ti’ múuch’il líik’sa’an Europa, América Latina yéetel Estados Unidos, tu ya’alaj Hugo Villa.

Arcadiae’ yaan u káajal tu k’iinil martes 25 tu súutukil 7 táan u taal u yáak’abtal, tu kúuchil Manuel Covarrubias ti’ Centro Cultural Universitario yéetel u cha’anil El grito, digitalmente utskíinsa’an. Le ken ts’o’okoke’ yaan u k’u’ubul u chíimpolalil medalla Filmoteca UNAM In memoriam ti’ López Arretche. Tu jo’oloje’ yaan xan u chìimpolta’al Óscar Menéndez láayli’ yéetele’.

Beeyxan yaan u ts’a’abal k’ajóoltbil u áanalte’il El grito: memoria en movimiento, tu k’iinil jueves 27 tu kúuchil Julio Bracho ti’ CCU, yéetel yaan u beeta’al kamp’éel cineconciertos yéetel tsikbalo’ob yóok’olal u múuch’ilo’ob cha’an yaan.