U jejeláasil óole' máan táanil ti' yéeytáambal yanchaj Estados Unidos

La Jornada Maya
Oochel Afp
K'iintsil

Jueves 8 ti' noviembre, 2018

Te’e k’iino’oba’ beetchaj yéeytambal ti’al u yila’al máax ken p’áatak meyaj tu kúuchil Congreso ti’ u noj lu’umil Estados Unidos. Chikpaj yéetel yéeyajile’ yaan k’eexilo’ob táan u yantal ti’ u tuukulil yóok’olal máaxo’ob unaj u yantalo’ob te’elo’.

Yáaxe’, chikpaj Rashida Tlaib juntúul demócrata ko’olel náajalnaj tu noj kaajil Michigan, leti’e’ u paalil ka’atúul palestinoilo’ob, ts’o’okole’ kex tumen ma’ yanchaj máax yéetel u ketikubáaj ichil republicano’obe’, jump’éel ba’al k’a’anan le ba’ax úucha’ tumen ku jelbesik tak ba’ax jach jets’a’an tumen múuch’kabil u méek’tantmaj. Beyxan Ilhan Omar, musulmanail, leti’e’ yáax somalí ko’olel ken u beet u legisladorail ti’ le noj lu’umo’. K’uch yéetel u baatsil tak jump’éel k’áax p’aatal ti’ u lu’umil Kenia, ti’ yanchajo’ob kamp’éel ja’abo’ob, ts’o’okole’ ka tu chukaj 12 u ja’abile’ bino’ob Estados Unidos.

Beey túuno’, jóok’ xan le yáax ka’atúul latinail ko’olelo’ob yaan u chikbesiko’ob Texas ichil Congreso. Leti’obe’ Verónica Escobar, máax tu beetaj ka’ach u x juezil El Paso, yéetel senadorail Sylvia García, ti’ u noj kaajil Houston, máano’ob yóok’ol máax táan u ketikuba’ob ka’ach ichil republicanos.

Leti’obe’ láayli’ táaka’ano’ob ichil le maanal 96 ko’olel yéeya’ab ti’al u ts’a’abal u muuk’il Partido Demócrata, úuchik u ya’abta’alo’ob ichil Cámara de Representantes. Kex tumen latiino’obe’ ku chikbesiko’ob óoli’ u 40 por cientoil ichil le 28 millonesil máak kaja’ano’ob Texase’, te’e kaajo’ mix juntéen yáax yéeya’ak juntúul hispanail ko’olel ti’al meyaj te’e Congresoo’.

Uláak’ juntúul máax yéeya’abe’, Jared Polis, leti’e’ yáax xiib u jets’maj homosexual tu táan kaaj ts’o’okole’ tu náajaltaj yéeytambal ti’al u beetik u jala’achil Colorado. Tu p’ataj paachil republicanoil Walker Stapleton. Polise’ juntúuk judío máak 43 u ja’abil yéetel mix juntéen tu ta’akaj máakalmáak u orientación sexual ka’alikil táan u beetik u xíimbal meyajil ti’al le yéeytambalo’.