Ángel Vargas y Carlos Paul
La Jornada Maya
Ciudad de México
Jueves 27 de diciembre, 2018
Ti’ le k’iino’oba’,chi’ichnakile’ táan u jach yantal ichil u ya’abil u aj meyajilo’ob miatsil ku bo’otalo’ob ichil ba’ax k’ajóolta’an beey capítulo 3000 (wa yéetel honorarios) tumen ma’ náach k’iin yanik le ken ts’o’okspajak u contrato’ob yéetel tumen túumben jala’ach oka’an meyaje’, tu beetaj jayp’éel k’eexilo’ob ti’ le taak’in yaan ti’al xupbilo’.
Ti’al ya’abach ti’ le aj meyajo’obe’, u ts’ook k’iinil u meyajo’ob ti’ u mola’ayilo’ob Secretaría de Cultura ti’ u Jala’achil u lu’umil Méxicoe’ leti’e’ 31 ti’ diciembre ku taala’, ts’o’okole’ ma’u yojelo’ob wa yaan u yantal ti’ob meyaj tu yáax k’iinil enero, beey úuchik u tsilbaltiko’ob ti’ La Jornada ba’ale’ tu k’áatajo’ob ma’u ya’alal máax y k’aaba’ob tumen saajko’ob ka beeta’ak wa ba’ax ti’ob.
Aj meyajo’obe’ tu ya’alajo’ob chi’ichnak yaniko’ob tumen mina’an mix u jo’olpóopilo’ob le mola’ay tu’ux ku meyajo’obo’ ti’al ka a’alak ti’ob ba’ax bíin úuchuk wa ba’ax je’el u páajtal u beetiko’obe’.
