Congresoe' ku éejentik keetil ba'ale' ku ya'alik ma' ti' u páajtalil wíinik

Óscar Rodríguez
Oochel Enrique Osorno
K'iintsil

Jo', YUcatán
Martes 16 ti' julio, 2019

Ichil jump’éel sesión ordinariae’, u kúuchil Congresoe’ ti’ u lu’umil Yucatáne’ tu éejentaj taak’in k’áata’ab ti’al u béeytal u beeta’al u nu’ukbesajil Yucatán Seguro, ba’ale’ beyxan tu jets’aj, tuka’atéen, ma’atáan u éejentik u ts’o’okol beel máak ichil xiibo’ob wa ko’olel, tumen ti’al ka béeyake’ unaj u k’exik u yáax yéetel u ka’a jaats ts’íibil ti’ artículo 94, tu’ux ku je’ets’ele’ u ts’o’okol u beel máake’ chéen ku páajtal u yúuchul ichil juntúul xiib yéetel juntúul ko’olel.

Yanchaj bolontúul máak tu ya’alaj ma’alo’ob ka úuchuk yéetel jo’olajuntúul tu ya’alaj ma’atáan u éejentik, beey úuchik u ts’o’okol k’eexil óota’ab beetbil ti’al u k’e’exel a’almaj t’aan, tu’ux ka páatak u ts’o’okol u beel máak ichil xiibo’ob wa ko’olelo’ob ti’ u lu’umil Yucatán. Óoli’ juntakáalili’ úuchik u beeta’al yéeyajil tumen u diputadosil 62 Legislatura, tumen ts’o’okili’ u yáax beeta’al tu k’iinil 10 ti’ abril.

Ja’atskab k’iin ka’aj káaj u cho’obal u eebilo’ob Congreso, múuch’o’ob éejentik ka beeta’ak yéetel uláak’o’ob ma’atáan u yóotiko’obe’ náats’o’ob ti’al u yilko’ob tuka’atéen ba’ax bíin úuchuk te’e yéeyajilo’. Óoli’ juntakáalili’ u xookil u múuch’il máako’ob éejentik yéetel ma’, ba’ale’ ichil diputadose’ asab ya’abchaj máaxo’ob ma’ tu yóotajo’obi’.

Ichil máaxo’ob éejentik ka béeyak u ts’o’okol u beel máako’ob je’el bixake’, ti’ yanchaj diputada Karla Franco Blanco, ti u múuch’il Partido Revolucionario Institucional (PRI) yéetel Silvia América López Escoffié, ti’ Movimiento Ciudadano (MC), máaxo’ob tu k’áatajo’ob ti’ u yéet meyajilo’ob Legislatura ti’al ka u éejento’ob ka beeta’ak k’eexil ti’ u artículoil 94 ti’ Constitución Política del Estado de Yucatán.

Kulukbal disputados ka’aj jo’op’ u tsikbaltiko’ob wa yaan u ye’esiko’ob wa ma’ u k’aaba’ máaxo’ob ku yéeyaj; ka’aj ts’o’ok u chan ch’a’ako’ob u je’elile’, je’ets’ u beeta’al votación cedular.

U diputadasil MC, López Escoffié yéetel Milagros Romero, tu ye’esajo’ob ba’ax yéeyajil ken u beeto’ob, beyxan beey beeta’abik tumen priístas Karla Franco Blanco yéetel Janice Escobedo Salazar, láayli’ beey úuchik u beetik perredista Alejandro Cuevas Mena, ba’ale’ leti’ tu ye’esaj ti’ redes sociales, tu ya’alajo’obe’ ku éejentiko’ob ka yanak matrimonio igualitario.

P’el úuchik u yojéelta’al ba’ax jóok’ te’e yéeyajilo’, máax jo’olbesik mesa directiva, Enrique Castillo Ruz, tu ya’alaje’ meyaj péektsilta’ab tumen máax tu beetaj u jala’achil Yucatán, Rolando Zapata Bello, ts’o’oksabij, le beetike’ líik’sa’ab yéetel a’alab ts’o’okspaj u meyajta’al.

Ba’ale’, máako’ob ku meyajo’ob ti’al ka éejenta’ake’ tu ya’alaje’ ma’atáan u p’atiko’ob meyaj; ka’aj ts’o’ok u yúuchul yéeyajile’ leti’obe’ tu ya’alo’obe’ “sajlu’um” máako’ob ti’ disputados, máaxo’ob ma’ tu ye’esajo’ob u yéeyajo’ob tumen jump’éel ba’al loobiltik u páajtalil wíinik.