La Jornada Maya
OOchel Secretaría de Cultura de Jalisco
K'iintsil
Te’e k’iino’oba’, jump’éel u woojil wíinkilal k’ajóolta’an beey Manneken Pis de Bruselas, beeta’ab tu ja’abil 1388, búukinta’ab jump’éel wixárika nook’ ti’. Le chan máaka’ ti’ yaan ichil u bejil L’Etuve yéetel Chenee’, ti’ u noj kaajil Bruselas.
Woojil wíinkilale’ ku p’isik 50 centímetros yéetel ja’abmanja’abe’ ku xíimbalta’al tumen ya’abach máak. Tu búukintaj u xa’anil p’óok, u páawo’, u tuup, u xanab yéetel u nook’il chuya’an yéetel chaquira. Tuláakal le je’elo’ meyajta’ab tumen junmúuch’ its’ato’ob ti’ u kaajil San Andrés Cohamiata, tu xamanil Jalisco.
Tu yóok’lal le je’ela’, t’aanaj máax jo’olbesik Secretaria de Cultura del Estado Jalisco, Giovana Jaspersen, ka tu ya’alaje’, u jach ma’alo’ob meyajil ku páajtal u beeta’al tu yóok’lal máasewal kaajo’obe’, leti’e’ jejeláas ba’al beetik u chikpajal u miatsilo’ob, ts’o’okole’ asab k’a’anan u beeta’al te’e ja’ab jeets’el beey Año Internacional de las Lenguas Indígenas, le beetike’ U Jala’achil u Lu’umil Jalisco tu k’ubaj búukinaj ti’ u jala’achil u lu’umil Bélgica, ti’al u chikbesa’al miatsil yaan tu lu’umil México ku náachtal tak je’el tu’uxake’.
Beey túuno’ búukinaj k’u’ube’ láak’inta’ab tumen ka’ap’éel u instalacionesil Ojos de Dios: jump’éele’ ti’ jts’a’ab tu tséel u bejilo’ob Manneken Pis, yéetel uláak’e’ tu kúuchil Palacio de Bellas Artes de Bruselas (BOZAR). Tuláakal Ojos de Dios ts’a’abe’ náak tak 600 u p’éelal, yéetel jbeeta’ab utmen aj its’at máako’ob wixaritaari ti’ u lu’umil Guadalajara yéetel ti’ San Andrés Cohamiata.
[b]Ma’ili’ ts’a’abak k’ajóoltbile’[/b]
Ma’ili’ búukinta’ak wixárika nook’ ti’ Manneken Pise’, tu much’ajubáaj Giovana Jaspersen García yéetel Viviane Hoffmann, Directora General Adjunta de la Dirección General de Educación, Juventud, Deporte y Cultura (EAC) ti’ Comisión Europea; Mauricio Escanero, u Embajadoril México tu táan Bélgica, u Ducadoil Luxemburgo tu táan Unión Europea; Bruno Castro, Oficial de Cooperación Internacional de la Comisión Europea; yéetel Monica Urian, ti’ Políticas Culturales de la Unión Europea.
Te’elo’, tsikbalta’ab jejeláas ba’alo’ob ti’al ka yanak múul meyaj yéetel ti’al u mu’uk’ankúunsa’al mola’ayo’ob ku péektsiltiko’ob miatsil tu lu’umil Jalisco, yéetel jump’éel nu’ukbesaj meyaj tu’ux ku táakapajal uláak’ táanxel lu’umo’ob.
