Reuters
OOchel Time
K'iintsil
Jueves 12 ti' diciembre, 2019
X áabiental aktibiistáa Greta Thunberg, táakelem x ch’úupal 16 u ja’abile’, yéeya’ab ti’al u chíimpolta’al beey u máakil u ja’abil 2019, ku je’ets’el tumen u pik’il ju’unil Time, beey ts’a’ab k’ajóoltbil le miércoles máanika’, le beetike’ ts’a’ab u yoochel tu yáax wáalil tu’ux ku páajtal u xo’okol “U muuk’il táankelemil”.
X ch’úupale’ tu ts’áaj u muuk’il u t’aan táankelemo’ob táan u líik’ilo’ob je’el bix leti’ob yéetel chi’ichnako’ob yóok’lal ba’ax táan u yúuchul yéetel yóok’ol kaab, le beetik túune’ ts’o’ok u yantal ya’abach máako’ob táakmuk’tik ba’ax yóok’lal ku t’aan, le je’ela’ káaj úuchik u beetik tu juunal jump’éel weelgáa yóok’lal talamilo’ob táan u máansik yóok’ol kaab, aktáan ti’ u Parlamentoil Suecia le ja’ab máaniko’.
“Ma’ táan u páajtal k kuxtal bejla’a wa ma’ jeets’el u sáastal to’on sáamal, tumen unaj yaan. Chéen leti’ u jaajil ba’ax táan k a’alaik, tu ya’alaj Thunberg ti’ Time.
Pik’il ju’une’ tsikbalnaj yéetel Thunberg yóok’ol cheem tu k’a’abéetkunsaj ti’al u bin Europa, tu’ux xáanchaj bulukp’éel p’is k’iino’ob táan u máan América del Norte tak noj kaajo’ob yaan Estados Unidos yéetel Canadá.
Thunberge’ jach u jets’amaj ba’ax yóok’lal ku líik’sik u t’aan tu táan máaxo’ob jo’olbesik noj ba’alo’ob ti’ yóok’ol kaab, leti’e’ ku ya’alike’ mixba’al ku beetiko’ob tu yóok’lal talamilo’ob yaan ti’ le k’iino’oba’.
X sueekail áaktibiistae’ ti’ yaan ka’ach Madrid ka j-a’alab ti’ yaan u chíimpolta’al, ti’ yaan ti’ jump’éel múuch’ tsikbal yóok’lal kliima táan u beeta’al tumen ONU, tu’ux táan u ya’alal jejeláas ba’alo’ob ti’al u kaláanta’al yóok’ol kaab.
“A’almaj t’aano’ob jets’a’an ti’al u kaláanta’al yóok’ol kaabe’ jach úuchbentako’ob, ts’o’okole’ talam u na’atal je’el bix xan talamil ba’ax táan u yúuchul, ba’ale’ Thunberge’ ma’ xan táan u páajtal u xu’ulsik chéen beyo’”, ts’íibta’ab tu pik’il ju’unil Time.
“Ba’ale’ leti’e’ ts’o’ok u béeykunsik u k’exik u yóol tu táan yóok’ol kaab, tumen táan u beetik u jelpajal ya’abach saatal tuukulo’ob ti’al u jéets’elo’ob tu tséel tu’ux ku máan leti’, ti’al ka séebchajak u k’éexel ba’al ti’al u yutsil yóok’ol kaab”.
“Leti’e’ táan u kóolik kaaj yaan u yóol u beet wa ba’ax uts ti’al yóok’ol kaab, yéetel tu sublakkúunsaj máaxo’ob ma’ tu beetajo’obi’”.
