de

del

AFP
Oochel neon.life
K'iintsil

Jueves 9 ti' enero, 2020
Las Vegas, Estados Unidos.

Samsunge’ tu ts’áaj k’ajóoltbil te’e k’iino’oba’ u túumben birtualil máako’ob, beey túuno’, mola’aye’ ku ya’alike’ le ba’alo’oba’ ku páajtal u tsikbalo’ob yéetel u yu’ubiko’ob jejeláas ba’alo’ob, je’el bix u yúuchul yéetel juntúul jach jaajil máak.

Birtual máako’obe’ ts’a’abo’ob k’ajóoltbil tu yáax k’iinil u ye’esajil Consumer Electronics Show ku beeta’al tu noj kaajil Las Vegas, táan u beeta’al te’e ja’abila’ 2020.

NEON u k’aaba’ yéetel beeta’ab tumen Star Labs, ti’ le yaan tu noj kaajil California, ti’alinta’an tumen noj surkoreanoil mola’ay Samsung.

Ba’ale’, yaan máako’ob jach kaambanaja’ano’ob, ku beetiko’ob ba’alo’ob je’el bix le je’elo’ táan u t’aano’ob, tumen yaan bin ba’alo’ob ma’ chíimpolta’ab tu beel tumen Samsung yóok’lal jayp’éel ba’alo’ob ta’akan ichil birtual máako’ob.

“Tak walkila’ mixba’al chika’an k ilik ta’akan ichil le je’ela’. NEONo’obe’ chéen u woojil máak ku chikpajal beey digitalo’ -u yoochel juntúl ba’al óoli’ je’el bix wíinike’-”, beey úuchik u ya’alal ti’ The Verge, kúuchil web tu’ux ku ts’íibta’al ya’abach ba’alo’ob yaan ba’al u yil yéetel túumben nu’ukulo’ob ku jóok’sa’al.

“Ma’ chi’ichnaktale’ex, mix táan u ‘lík’il áandroides tajan yaan u na’ato’ob’, leti’obe’ ma’ áartificial wíiniko’obi’, ma’ leti’ le táan a kaxke’exo’”, tu ya’alaj.

Ichil ba’ax a’alab tumen kúuchil yaan Californiae’, ku tsikbaltik le ba’ax tu ts’áajo’ob k’ajóoltbile’ chéen ba’alo’ob je’el u páajtal u chikpajalo’ob ti’ díispositiboos wa ti’ nu’ukulo’on tu’ux ku yúuchul báaxal, yéetel ku páajtal u beetiko’ob ba’alo’ob je’el bix u t’aano’ob ti’ máaben cha’an, u k’a’aytiko’ob wa ba’ax, wa u beetik u aj balts’amilo’ob, ba’ale’ je’el xan u beetik u láak’inajo’obe’.

Láak’inajo’ob yéetel éetajilo’ob

NEONo’obe’ je’el u beetik k láakinajo’obe’, k éetajilo’ob yéetel k éet máano’ob. Mantats’ u kaambalo’ob, u k’éexelo’ob yéetel u k’a’ajsiko’ob ba’ax ku beetiko’ob, beey tu ya’alaj Pranav Mistry, máax jo’olbesik u jaatsil meyaj láaboratorioo.

Star Labs ku ya’alik NEONo’ob bine’ yaan u na’ato’ob ti’al u yojéeltiko’ob bix u chikpajalo’ob ti’ táan máak, ba’ax ku beetiko’ob wa bix unaj u biinsikubáaj yéetel wíinik.

Kex tumen birtual máako’ob ts’o’ok u yáax beeta’alo’ob yéetel ts’o’okili’ u yáax chikpajalo’ob ti’ báaxalo’obe’, u jela’anil yéetel NEONo’obe’ leti’ u páajtalil u tsikbalo’ob yéetel wíinik ts’o’okole’ ku yu’ubiko’ob ba’al, beey a’alabik tumen máaxo’ob patjo’olto’ob.
Lalaj NEONo’obe’ jump’éelili’ bixij, ts’o’okole’ ku páajtal u ye’esik bix u yóolo’ob, ku péeko’ob yéetel ku tsikbalo’ob.