Juan Manuel Vázquez
Oochel Ch'a'aban ti' Medallistas olímpicos mexicanos
K'iintsil
Ciudad de México
Martes 14 ti' enero, 2020
Ciudad de México. Carlos Girón j méedayista olimpikóo ichil u jaatsil klabaadose’, sa’at u kuxtal jo’oljeak lunes. 65 u ja’abil ka’achij yéetel kíim úuchik u máansik maanal ti’ junk’aal k’iino’ob ichil talamilo’ob tumen tsaayal ka’ach ti’ pulmonía, beey úuchik u je’ets’el tumen u baatsil Girón ti’ ump’éel k’a’aytajil ts’íib ts’a’ab k’ajóoltbil ti’ redes sosialées.
Carlos Girón (Mexicali, 1954) juntúul máak mantats’ náajalnaj ba’ale’ mix juntéen tu k’amaj u ooroil, beey úuchik ti’ mantats’ tu kuxtal. Leti’e’ tu náajaltaj u medaayail plaata ichil u keetilo’ob Moscú, tu ja’abil 1980, tumen yaan jump’éel ba’al ma’ patal jóok’ik ichil le keetilo’.
Leti’e’ táakpaj te’e keetilo’ tumen leti’ u jach no’ojanil ti’al u beetik, máan táanil ti’ uláak’ k’a’anan máako’ob jach kaambanaja’ano’ob ti’ le keetil te’e k’iino’obe’. U ts’ook keetil tráampolin 3 meetrose’ úuch ichil Girón yéetel Alexander Portnov, ti’ u lu’umil Moscú. J sovietikoile’ unaj u beetik xaan le kláavado je’elo’ ti’al ka páatak u je’ets’el wa ti’ leti’ ku p’áatal wa ma’ u medayadil oro; jach ta’aytak túun u pulikubáaje’ ka’aj wáak’ awatilo’ob úuchik u jéets’el túumben reekord ti’ uláak’ pisiináa yaan te’e kúuchilo’. Kex tumen táan u seen uchul awate’, leti’e’ tu pulajubáaj, ba’ale’ jach ma’ patal ba’ax jóok’i’.
Giróne’ tu yojéeltaj túun u medayail ooroe0’ u ti’al. Ba’ale’ sobiietikoil máako’obe’ tu ya’alajo’ob leti’e’ awato’ob ba’ax beet u k’asta’al u meyaj kláabadistaa, le beetik tu k’áatajo’ob ka jel beeta’ak.
Beey túuno’, juueso’obe’ yanchaj u k’áatiko’ob ti’ Portnove’ ka u jel beet kláabado, ti’al beyo’, u je’ets’el medayae’ u ti’al Unión Soviética.
Mix máak ichil u jala’chilo’ob Méxicoe’ t’aanaj ti’al u táakmuk’ta’al Girón, kláabadistae’ káaj u kaambal lik’ul u tuunichil u ja’ilo’ob Acapulco yéetel tu ts’o’oksaj tu poodioil Moscú, tu ja’abil 1980.
Úuchik u ts’a’abal k’ajóotlibl u sa’atal u kuxtal ti’ Twiitere’, Comité Olímpico Mexicano (COM) tu yajóoltaj u kíimil “juntúul máak jach chíimpolta’an”.
