Emilio Gómez
Oochel Koalas de NYC’
K'iintsil
México
Viernes 17 de enero, 2020
Ts’o’ok u máan jayp’éel k’iino’ob káajak u multa’al u poostesilo’ob sáasil ts’a’aban tu bejilo’ob Nueva York, tumen u peluchesil mejen koalas, le je’ela’ táan u beeta’al ti’al u kaxta’al ka yanak máak ka u yáant u ba’alche’ilo’ob Australia, tumen mina’an u yotocho’ob úuchik u t’áabal k’áak’ tu k’áaxilo’ob le lu’umo’.
Le je’ela’ jump’éel nu’ukesaj ku k’aaba’tik Cummins&Partners, táan u beeta’al tumen jump’éel u mola’ayil diseenio, káaj u meyaj tu kaajil Melbourne, Australia, ba’ale’ nu’ukbesaje’ táan u beeta’al tuemn jump’éel yaan tu noj kaajil Nueva York.
Ka’aj ts’a’ab pelucheo’obe’ beeta’ab u méek’iko’ob u poostesil le noj beejo’ob yaan te’e kaajo’ ti’al beyo’ u páajtal u yaajsiko’ob u tuukul kaaj, tu yóok’lal talamilo’ob táan u máansa’al tu lu’umil Australia úuchik u jach líik’il k’áak’ ich k’áax, le beetike’ táan u kaxta’al u páajtal u ma’anal u nu’ukulil ts’akyajo’ob je’el u yáantaj ti’al u ts’aatáanta’al ba’alche’ob chuja’ano’ob, je’el bix canguros, koalas, ualabís yéetel uláak’o’ob.
Ti’ junts’íit u yook báaxalo’obe’ t’iina’an jump’éel k’ank’an ju’un tu’ux ku páajtal u xo’okol: “Mil miyoonesil ba’alche’ob chéen ichil le k’áax je’el kuxa’ano’ob ka’acho’, mina’an uláak’o’ob ti’ yóok’ol kaabe’ ts’o’ok u kíimilo’ob úuchik u jóopol k’áak’ ichil u k’áaxilo’ob Australia”. Paach ti’ le je’elo’ ts’a’aban jump’éel koodigóo QR tu’ux ku tso’olol ba’ax unaj u beetik máak ti’al u yáantaj ichil u kúuchil Internet Koalas of NYC’, le je’ela’ jóolméek’ta’an tumen Go Fund Me, kúuchil web ku meyaj ikil u kaxtik áantaj ti’al jejeláas ba’alo’ob.
Nu’ukbesaje’ ts’a’ab k’ajóotlbil le 10 ti’ enero máaniko’, tak tu súutukil táan u ts’íibta’al le je’ela’ ts’o’ok maanal 10 mil dólares much’a’ak yéetel 15 mil dólares u yáax xuulil jets’a’an unaj u múuch’ul.
K’áax ts’o’ok u yelel yóok’lal k’áak’ jóop tu winalil septiembre ti’ u ja’abil 2019e’ ts’o’ok u píitmáansik kamp’éel millonesil hectáreas, tu noj lu’umilo’ob Nueva Gales del Sur yéetel Victoria ts’o’ok u jach úuchul loob, tumen ts’o’ok maanal junk’aal máak kimen tu yóok’lal.
