de

del

Abraham Bote
Oochel Fernando Eloy
K'iintsil

Mérida, Yucatán

U ajkanan kaajilo’ob ti’ u mola’ayilo’ob Secretaría de Seguridad Pública, Policía Municipal yéetel Guardia Nacionale’ tu xíimbaltajo’ob u bejilo’ob u noj kaajil Jo’ ti’al u k’áatiko’ob ti’ kaaj yéetel ti’ aj xíinximbal máako’obe’ ka luk’ko’ob te’e tu’ux ku máan ya’abach máako’ob yéetel ka’aj xiko’ob tu taanajo’ob úuchak u je’ets’el u káajal emergencia sanitaria tu yáax k’iinil u winalil abril.

Beey túuno’ ti’al u chan ch’éensa’al u xookil jaytúul máako’ob ku pa’ak’al ti’ u k’oja’anil Coronaviruse’, u jala’achil u noj lu’umil Yucatán, Mauricio Vila Dosal, tu k’a’aytaj u k’a’alal kúuchilo’ob koonol ma’ jach k’a’anantako’obi’ yéetel tu ya’alaj xan uláak’ ba’alo’ob najmal u beeta’al ti’al u kaláanta’al u toj óolal yúukatekoilo’ob, ba’ale’ jach ku táanilkúunsa’al máaxo’ob ma’ jach toj u beelo’ob ti’al u kaláantikubáajo’ob.

Beyxan tu k’a’ajtaye’ u mola’ayil SSP yaan u beetik jump’éel operativo ti’al u jach ts’aatáanta’al táan u beeta’alt u beel le ba’ax je’ets’ tumen le jala’acho’. Le beetike’ tu k’iinil jo’oljeake’ páatchaj u yila’al yanchaj aj kanan kaajo’ob ti’ le óoxp’éel mola’ayo’obo’ máan u xíimbalto’ob u bejilo’ob u noj kaajil Jo’, ti‘al u kaláantiko‘ob kaaj.