Juan Manuel Contreras
Oochel: Rodrigo Díaz Guzmán / Archvio
K'iintsil
Mérida, Yucatán
Lunes 4 ti' abril, 2020
Te’e k’iino’oba’ jts’a’ab k’ajóoltbile’, k’e’ex máax jo’olbesik u nojoch cha’anil Feria Internacional del Libro de Yucatán (Filey). J-a’alabe’ Enrique Martín Briceño p’áat táanil ti’al u meyajtik, le beetik leti’e’ tu tsikbaltaje’ yaan u kaxpajal ka páatak u jach péeksilta’al ich kaaj ka úuchuk xook, beyxan yaan u asab táakbesa’al mayáaj t’aani’ yéetel táan u tukulta’al u ts’a’abal jump’éel virtual nu’ukbesaj ka’alikil táan xan u yúuchul le cha’ano’.
Martín Briceñoe’ tu ya’alaj u je’ets’el beey u túumben jo’olbesajil cha’ane’ ku beetik u ki’imaktal u yóol yéetel ba’ax k’ubenta’an ti’, tumen yéetele’ ku chíimpolta’al u meyajil maitsil ts’o’ok u beetik ti’ maanal 30 ja’abo’ob.
“Jach ki’imak in wóol in jo’olbesik jump’éel tin wilaj bix úuchik u síijil”, tu ya’alaj, máax táakpaj ti’ múuch’tambal beeta’ab ka’aj je’ets’ u patjo’olta’al u beeta’al cha’an, tu ja’abil 2011, ka’alikil táan ka’ach u jo’olbesik u jaatsil meyaj Patrimonio Cultural ti’ u mola’ayil Instituto de la Cultura de Yucatán.
