U jala’achil u péetlu’umil Quintana Roo, ikil u k’ubéentmaj meyaj ti’ u mola’ayil Secretaría de Ecología y Medio Ambiente (Sema) beyxan ti’ u múuch’kabil Política y Legislación Ambiental (Polea), yéetel u yáantaj u nu’ukbesajil Programa México-UK PACT (Partnering for Accelerated Climate Transitions) ti’ u jala’achil u noj lu’umil Reino Unido, tu k’ubaj tu táan máaxo’ob beetik ka utsil yanak ba’ax k’a’abéet ti’al u kaláanta’al yóok’ol kaab te’e péetlu’umo’ meyaj k’aaba’inta’an beey Reglamento de la Ley de Acción de Cambio Climático de Quintana Roo.
Yóok’lale’, u meyajnáalil Ecología y Medio Ambiente, Efraín Villanueva Arcos, tu ya’alaje’ ichil jayp’éel k’a’anan ba’al yaan ichil tsolnu’uke’, ti’ yaan ka súutuk foormalil meyaj ku taal u beeta’al tumen Comisión Estatal de Cambio Climático, tumen ti’ ku tso’olol bix u meyajo’ob yéetel ba’ax táan u beetik te’e péetlu’umo’, beyxan túumbenkunsa’an ba’ax ku táakbesa’al ti’al u ts’aatáanta’al Programa Estatal de Acción al Cambio Climático, je’el bix xan Sistema de Monitoreo, Reporte y Verificación Estatal.
También te puede interesar: QRoo: Presentan proyecto del Reglamento de la Ley de Acción de Cambio Climático
Villanueva Arcose’ tu ya’alaj jets’a’ab u nu’ukil ti’al u béeytal u beeta’al Normas Técnicas Ambientales ti’ ba’ax yaan u yil yéetel u k’eexilo’ob táan u yantal ti’ yóok’ol kaab, yéetel ba’ax ku ch’a’anukta’al ti’al u káajsa’al u beeta’al u tsool k’aaba’ nu’ukbesjo’ob táakbesa’an ichil mercado de bonos de carbono táaka’an tu Registroil Estatal de Emisiones de Compuestos y Gases de Efecto Invernadero ti’ máaxo’ob óotik meyajtik tu juunalo’obi’.
Beyxan táakbesa’ab ba’ax ts’o’okili’ u yáax je’ets’el tu tsoolnu’ukil beeta’an tumen féederasyon ti’al u p’éelilikúunsa’al ba’ax najmal u yantal ti’ reportée yéetel bix unaj u ch’a’anukta’al u p’i’isil u éemisyonesil gaas beyxan u kóompuestosil efektóo íinbernaderóo, je’el bix xan u nu’ukil u repotáarata’al, u p’i’isil yéetel u sáaslkúnnsa’al ba’ax ku ya’alal.
Andrés Ávila, máax jo’olbesik Polea, tu ts’áaj k’ajóoltbil ba’ax ch’a’anukta’ab ti’al u beeta’al a’almajt’aan, tu’ux xan ku tso’olol bix najmal u ch’a’anukta’al ba’ax táan u beetik péetlu’um yóok’lal u k’eexilo’ob yóok’ol kaab.
Te’el súutuk úuchik u ts’a’abal k’ajóoltbilo’, táakpaj máax jo’olbesik Comisión de Medio Ambiente y Cambio Climático, Tyara Schleske de Ariño, ichil Congreso del Estado de Quintana Roo.
Xak'alutskíinsa'an tumen: Sasil Sánchez Chan
