de

del

Meyajta’ab u nu’ukbesajil realidad birtuaal ti’al u kaláanta’al Arrecife Alacranes tu lu’umil Yucatán

Crean experiencia de realidad virtual para proteger el Arrecife Alacranes
Foto: Captura de pantalla

Ikil u kaxta’al u péektsilta’al u kaláanta’al Parque Nacional Arrecife Alacranes, u múuch’kabil Oceanae’ tu meyajtaj u realidad birtuaalil 360°, yéetel le ku páajtal u yilik kaaj jach bix u kúuchil Área Natural Protegida. 

Múuch’kabile’ tu ts’áaj k’ajóoltbil le meyaja’, tu kúuchil e’esajil Museo del Meteorito, p’aatal tu noj kaajil Progreso.

“Ba’ax meyajta’abe’ táan u kaxtik u péeksik u yóol yukatekoilo’ob ti’al u na’ata’al ba’axten k’a’anan Arrecife Alacranes, tumen beyo’, je’el xan u páajtal u k’ajóolta’al u ki’ichkelemil le kúuchil p’aatal 140 kms náach ti’ u jáal ja’il Yucatán, yéetel beeta’ab ti’al xan u yantal u jeel nu’ukbesajo’ob kaláantik le kúuchil k’áak’náaba’”, beeu tu tsikbaltaj Miguel Rivas, máax jo’olbesik Santuarios Marinos ichil u múuch’kabil Oceana

 

También te puede interesar:Crean experiencia de realidad virtual para proteger el Arrecife Alacranes


Kúuchil k’áak’náabe’ najmal u kaláanta’al tu jach ma’alobil ku páajtal, yéetel u k’a’abéetkunsa’al taak’in u ti’al, tumen Arrecife Alacranese’ kaja’an maanal 130 u p’éel u jejeláasil koralo’ob, yéetel yaan tu’ux ku k’uchul e’el ka’ap’éel, ti’ u kamp’éel u jejeláasil, u áakilo’ob k’áak’náab yaan ichil Parque Nacional, tu’ux ku jóok’ol u meyaj 4 mil 360 u túul ajchuk kayajo’ob yaan tu lu’umil Yucatán. Wa ka p’áatak mina’an jump’éel kúuchil je’el bix le je’ela’ je’el u jach táaj loobiltik yóok’ol kaabe’ yéetel kuxtal yaan tu jáal ja’il Yucatán, ba’ale’ beyxan ti’al kaaj ku meyaj te’e kúuchila’. 

“Kéen k’uchuk máak u xíimbalt kúuchil yéetel kéen okok báabe’, ichil le realidad birtualo’,, ku xíimbalkúunsa’al ti’ wakp’éel u jaatsilo’ob Parque Nacional Arrecife Alacranes. Ts’o’okole’, yaan tu’uxe’ ku páajtal u kaxta’al medaayas ta’aka’an, ti’al u kaxta’alo’ob ichil 20 miinuutosil ku xáantal díijital cha’an ku beeta’ali’”, tu tsikbaltaj.  

Ku béeytal u cha’anta’al wa ku yokol máak u xak’alt u kúuchil www.proyectoalacranes.org yéetel je’el u meyaj yéetel je’el máakalmáak séelular, taablet wa kóomputadoráa.

Beey túuno’, ti’al u páajtal u cha’anta’al tu beel xane’, u múuch’kabil Oceana tu ts’áaj jump’éel moodulóo xma’ bo’olil, tu’ux yaan tak u biisoresil 3D, tu kúuchil Museo del Meteorito (Boulevard Turístico Malecón, 97320, Progreso, Yuc.) ichil u k’iinil 11 tak 14 ti’ agosto, tu súutukil láas 4 tak 8 áak’ab pm; beyxan tu kúuchil Gran Plaza, Jo’, Yuc. ichil u k’iinil 17 tak 20 ti’ agosto, tu súutukil 1 tak 8 áak’ab; Plaza La Isla, Jo’, Yuc. ichil 25 tak 28 ti’ agostom tu súutukil 1 tak 8 áak’ab, yéetel tu kúuchil Pasaje Picheta ichil u yáax k’iinil septiembre tak 4 ti’ le winalo’.

Xak'alutskíinsa'an tumen: Sasil Sánchez Chan