Tu yo'olal Luis Demetrio Góngora Pat

Kíinsa’abik táanxelil lu’ume’, yaj óolal ti’ yóok’ol kaab

Ts'íib yéetel oochel: Paul Antoine Matos
K'iintsil

Viernes 4 ti' noviembre, 2016

Luis Demetrio Góngora Pat, juntúul óotsil maaya, k’uch meyaj tak te’e náacho’ ba’ale’ p’áat chéen bey u máantu bejilo’ob San Francisco, j kíim tu k’ab aj kanan kaajo’ob ti’ le noj kaaj yaan Californiao’, “jump’éel ba’ax ku péeksik u yóol yóok’ol kab”, le beetik u jala’achil u noj lu’umli México, unaj u lep’ik u yóol tia’al u k’áatik ti’ Estados Unidos, ka u jets’ a’alamaj t’aan yóok’ol le ba’ax úucho’, beey tu ya’alaj Adante Pointer, u abogadoil ti’ u baatsil le animaso’.

Máaxo’ob ku meyajo’ob ti’ Justice and Honor for Luis Gongora, tu xíimbaltajo’ob Yucatán láak’inta’ano’ob tumen u abogadoil le animaso’, tia’al u tsikbaltiko’ob ti’ u láak’o’ob Demetrio, ba’ax uláak’ ucha’an yóok’ol le je’elo’.

Abogadoe’, tu ya’alaje’, k’a’anan ka péeknak u jala’achil u noj lu’umil México, tia’al u tsáaypachtik Estados Unidos, tumen leti’obe’ chéen ku yóotik u tsoliko’ob ba’axten kiinsajnaj aj kanan kaajo’ob, ba’ale’ ma’ tu ch’a’anukta’al a’almaj t’aan je’el bix unaje’.

Ti’ le xíimbal tu beetaj Adriana Camarena, máax táakpaja’an ti’ le múuch’kabilo’, beyxan le bogado yéetel uláak’ máako’ob ku péektsiltiko’ob u páajtalil máak, tu xíimbaltajo’ob Teabo tia’al u láak’intiko’ob u baatsil Góngora Pat tu k’iinil finados yéetel tu síijo’ob ti’ob jump’éel nook’ tu’ux chuya’an oochelo’ob tia’al u líik’sa’al u yóol u baatsilo’ob Demetrio.

Rosana Góngora May, u yaal Góngora Pate’, tu ya’alaje’ “ma’ j cha’ab k ka’a much’ikbáaj yéetel”, ka’alikil u yatan, Carmen May tu ya’alaj “yaan u yaj óoltik tak le ken beeta’ak u jets’ek a’almaj t’aan yóok’ol le ba’ax úuch tu k’iinil 7 ti’ abril máaniko’”.