Munale' ku páayt'antik máak ti'al ka okok ichil u tuukul meyajil Carlos Mérida

Alejandra Ortiz Castañares
OOchel cortesía del Munal
K'iintsil

Ciudad de México
Jueves 6 ti' diciembre, 2018

Ba’ax ka wu’uyik le ken jo’op’ok a xíimbal yóok’ol u bejil Paseo de la Reforma, wa tu tojil Insurgentes, u kúuchil Centro Cultural Universitario ti’ u noj najil xook Universidad Nacional Autónoma de México, wa tu’ux ku tíip’il u túumben kúuchil Manacar, wa ti’ u kúuchil Museo Nacional de Antropología, wa le ken a walak’t je’el ba’axak áanalte’ yóok’ol mexicanoil its’at, yéetel ku chikpajal wa ba’ax ti’ u ki’ichkelem meyajil Carlos Mérida, ku ki’imaktal u yóol máak ba’ale’ beyxan ¡u taakankil u yojéelta’al máax beetej!

U kúuchil Museo Nacional de Arte (Munal) tu ch’a’aj yéetel tuláakal u yóol, le beetike’ táan u beetik u ye’esajil: Carlos Mérida 1891-1984: retrato escrito, yaan u ts’o’okol tak tu k’inil 17 ti’ marzo ti’ u ja’abil 2019. U tuukulil meyaje’, ku biinsiko’ob tak ti’ estética yéetel multidisciplinario tuukul Mérida.

U baakel e’esajile’ beeta’an yéetel u yóol xookil ts’íib yéetel xookil cha’an jóok’ ti’ u áarchivoil k’uba’an ti’ Munal tumen Alma Mérida, ti’ u ja’abil 2000, úuchak u chukbesa’al yéetel óoxp’éel áarchivos ti’alinta’an tumen j its’at: le yaan ti’ u kúuchil galerías Arvil (máaxo’ob péektsiltik e’esajil) yéetel Arte Mexicano, beyxan le ti’alinta’an tumen Cristina Navas Mérida, u yáabil j its’at.

Ts’o’ok u máan 127 ja’abo’ob úuchik u síijil j guatemaltecoil boonil

U muuk’il u meyajil curaduríae’ ku chikbesik xak’al xook beeta’an ti’al u táakmuk’ta’al, tumen múuch’il máako’obe’ xáanchajo’ob ka’ap’éel ja’ab táan u beetiko’ob u meyajil, jo’olbesa’an tumen María Estela Duarte, yéetel yanchaj buluktúul aj xak’al xooko’ob, ichilo’obe’ ti’ yaan Magda-lena Dávila, Bárbara Gallardo, Cuauhtémoc Lira, Alejandro Zamora yéetel Emmanuel Ortiz, leti’obe tu jach xak’altajo’ob yéetele tu tsolajo’ob le káamp’éel jaatsilo’ob meyaj yaan.

Ti’ jump’éel k’áat chi’ tsikbal tu beetaj yéetel La Jornadae’, múuch’ meyaje’ tu k’a’ajsaj Carlos Mérida (Guatemala, 2 ti’ diciembre ti’ u ja’abil 1891 -Ciudad de México, 21 ti’ diciembre ti’ 1984), úuchik u máak 127 ja’abo’ob úuchik u yantal.

-Tu yóok’olal meyaj p’ata’ab tumen Méridae’, máaxi’

-Juntúul j its’at ya’abach ba’al u yojel, kaambanaja’an yéetel jach mina’an uláak’ juntúul je’ex leti’o. Ma’ chéen juntúul j booni’, tu kanaj xan diseñar, escenógrafo, coreógrafo, j boonil yéetel u críticoil ita’at.

–K’ajóolta’an wáaj tumen máaxo’ob ku cha’an

–Chéen jump’íit. U ya’abil meyaj u beetmaje’ táakbesa’an ti’ múuch’ilo’ob ma’ ts’a’aban k’ajóoltbil ti’ kaaji’, ma’ chéen u meyajil ‘‘‘caballeteili’” ku beetik xan bon pak’. Beyxan ti’ jatsa’an ichil Estados Unidos, México yéetel Guatemala.

– Máakalmáak u ADNil u geometrismoil Mérida

–Ichil ba’ax tu ya’alaj leti’ ti’ u meyajil Autorretratoe’, yanchaj ka’ap’éel u nooyil péektsilt u meyaj. Jump’éele’ leti’e’ ku taal tu lu’umil Europa, ch’a’aban ti’ ‘‘cubismo sintético yéetel arte abstracto lírico”. Uláak’ jump’éele’ maaya its’at yéetel paax. Beey úuchik u ya’alika: “U yóol abstraccióne’, le yanchaj ti’ in j ka’ansajo’ob, úuchben máako’ob (...) boon uti’al boon, u ki’ óolta’al boon, je’el bix u ki óolta’al paax yóok’olal bix u juum. Yaanten, mantats’, juntúul j paaxil máak ma’atech u chikbesikubáaj chéen tumen yaan boono’ob (...) abstracto boonile’ ku ye’esik u asab ma’alo’ob bejil u ti’al”.

Yanchaj uláak’ pak’il boono’ob tu beetaj

– Yóok’olal boonil pak’ tu beetaj, ba’ax ta wojéeltaje’ex
–Mérida tu beetaj uláak’ boonil pak’o’ob ma’ yáax jets’a’an ichil u múuch’ meyajili’. Yaan kex 80 u p’éel táanil meyajo’ob ti’ pak’il boon, ichil le je’elo’obe’ tu beetaj 37; ti’ le je’elo’obe’ 24 tu beetaj México, 10 ti’ Guatemala yéetel óoxp’éel ti’ Estados Unidos. Yaan u yojéelta’al uláak’ ba’alo’ob ma’ tu xáantal.