U sakbejilo'ob péepenk'áak'e' ku asab loobiltik yóok'ol kaab wa ku ke'etel yéetel gases ku jóok'sik turbinas

De la Redacción
Oochel Ap
K'iintsil

Viernes 23 ti' agosto, 2019

Jump’éel túumben xak’al xook jts’a’ab k’ajóoltbil tumen u pik’il ju’unil Atmospheric Chemistry and Physics, meyajta’ab tumen Unión Europea de Geociencias, ku ya’alike’ estelas -sak bejo’ob p’atik péepenk’áak’ le ken máanake’- ku jach loobiltik yóok’ol kaab, tumen ku tukulta’ale’ asab ya’ab talamil ku taasik wa ku ke’etel yéetel le beyka’aj k’asil ku yantal yéetel le k’ajóolta’an beey gases de efecto invernadero ku jóok’ol ti’ u turbinasil.

Sakbejo’obe’ k’ajóolta’an beey contrails (condensation trails, ich káastelan t’aane’ u k’áat u ya’al senderos de condensación), yéetel ku yantalo’ob tumen gases ku jóok’ol ti’ u motoresil péepenk’áak’e’ ku jach chokotalo’ob. Le túune’, le je’elo’ ku beetik u condensarpajal u yooxolil ja’ ku yantal te’e jach síis ka’ano’.

Yóok’lal bix yanik humedad yéetel u síisile’, je’el u páajtal u sa’atal bejo’ob wa u nojochtalo’ob tak le ken súutuk múuyal. Beey túuno’, múuyalo’ob ku yantal tu juunalo’ob yóok’al u yooxolil ja’e’ ku ts’u’uts’iko’ob u yooxolil yóok’ol kaab, ba’ale’ ma’atech u k’a’abéetkunsiko’ob u sáasil K’iin, ba’ale’ sakbejo’ob ku p’a’atal tumen péepenk’áak’o’obe’ ku ch’a’ako’ob ooxol ku yantal yéetel ku ch’a’ako’ob xan u yooxolil K’iin. Le je’ela’ ku yúuchul tumen ku yantal xan mejen ch’áajilo’ob bat k’a’amkunsik ba’ax k’ajóolta’an beey efecto invernadero.

U jach k’a’abéetkunsa’al péepenk’áak’

U xyuumilo’ob xak’al xook, Lisa Bock yéetel Ulrike Burkhardt, ti’ u kúuchil Centro Aeroespacial Alemán (DLR, yóok’lal bix u k’aaba’ ich káastelan t’aan) ku ya’aliko’obe’ múuyal ku yantal yóok’lal péepenk’áak’e’ je’el u beetik u yóoxtental k’aasil ku beetik yóok’lal bix je’el u chokotal yóok’ol kaab ti’al u ja’abil 2050, wa ku ke’etel yéetel le beyka’aj yanchaj 2006, ja’ab úuchik u káajsik u beetiko’ob xaak’alil, wa tumen ku ya’abtal u k’a’abéetkunsa’al péepenk’áak’ je’el bix tak bejla’o’ yéetel wa tumen ma’atáan u beeta’al mixba’al tu yóok’lal.

Jump’éel xak’alxook yáax beeta’ane’ ku ye’esik u 0.61 ti’ u túulisil ka’ane’ pixa’an tumen contrails. Ba’ale’, tu’ux ku asab máan péepenk’áak’ je’el bix u ka’anil Europa yéetel Norteamérica, táan u bin u ka’antal u xookil, tumen ts’o’ok u náakal tak 10 por cientoil tu lak’inil Estados Unidos yéetel Úuchben Continente.

Walkila’ yaan jayp’éel ba’al ts’o’ok u chikpajal te’e xak’alxooko’, ila’ab contrailse’ ku asab ya’abkusniko’ob u chokolil yóok’ol kaab wa ku ke’etel yéetel le beyka’aj ku yantal yóok’lal u motorilo’ob péepenk’áak’; tumen u seten k’a’abéetkunsalo’obe’ ku ya’abkunsik xan le beyka’aj óxido de nitrógeno, azufre, buuts’ yéetel u yooxolil ja’ yaan, ts’o’okole’ tak dióxido de carbonoe’ ku beetik ka tukulta’ak ba’ax je’el u beeta’al ti’al ka chan ch’éenek talamilo’ob tu yóok’lal. U kúuchil Agencia Federal del Medio Ambiente en Alemania (UBA) ku ya’alike’ ichil tuláakal gases de efecto invernadero ku yantal yóok’ol kaabe’ u 5 por cientoile’ ku yantal le ken k’a’abéetkunsa’ak péepenk’áak’.

U xaak’alil suecail mola’ay

Ti’ yóok’ol kaabe’ ku líik’il sáansamal 200 mil u p’éel péepenk’áak’o’ob, beey u ya’alal tumen FlightRadar24, jump’éel suecail mola’ay xak’altik ba’ax ku yúuchul yéetel le ba’alo’oba’. Chéen ti’ u kúuchil Aeropuerto Internacional Benito Juárez de la Ciudad de México ts’o’ok u líik’il 224 mil 967 u p’éel péepenk’áak’ yóok’lal koonol ti’ le ja’ab táan u yáalkaba’.

Ti’ jump’éel xak’alxook jook’sa’ab tumen Instituto Mexicano del Transporte (IMT) ku ye’esale’ tu ja’abil 2010e’, péepenk’áak’o’ob líik’ tu noj lu’umil Méxicoe’ tu jóok’sajo’ob 8 millones 213 mil 580.9 toneladasil dióxido de carbono (CO2), 4 mil 437.6 óxido de azufre yéetel 86 mil 734.8 óxido de nitrógeno.

Beey túuno’ yéetel u yáantajil u nu’ukesajil Atmosfair, alemanail múuch’kabil ku meyaj ti’al u kaxta’al ka p’íitkunsa’ak dióxido de carbono ku jóok’ole’, ku ya’alike’ le ken yanak jump’éel péepenk’áak’ ku líik’il ti’al u bin yéetel u suut ti’ Ciudad de México tak Madrid, España, ku yantal kex mil 500 kilos ti’ dióxido de carbono, ts’o’okole’ le je’elo’ jump’éel ba’al ku píitmáansik le beyka’aj ku jóok’sa’al tumen juntúul máak ichil jump’éel ja’ab, ti’ maanal 60 u p’éel noj lu’umo’ob.

Tu winalil octubre ti’ u ja’abil 2016e’ yanchaj jump’éel mokt’aanil ti’al u p’íitkunsa’al k’aasil ku beeta’al ti’ yóok’ol kaab tumen péepenk’áak’, yéetel u yáantajil Organización de Aviación Civil Internacional de las Naciones Unidas, tu’ux táan u kaxta’al ka yanak mokt’aanil tu yóok’lale’, ichil Acuerdo de París beeta’ab tu ja’abil 2015, u ma’alobkunsa’al bix u meyaj sáasil yéetel u yila’al beyka’aj dióxido de carbono yaan u yantal ti’al u ja’abil 2020.