Ts'o'ok u yantal yáax máak kimen úuchik u wa'ak'al ba'al tumen Turquía ich Siria lu'umil

Afp - Europa Press
Oochel Kerem Kocalar
K'iintsil

Jueves 10 ti' octubre, 2019
Beirut

U seen wa’awak’al ba’al tumen tuurko’ob tu xamanil Siriae’ tu beetaj u sa’atal u kuxtal ka’atúul máak, beey ts’a’ab k’ajóoltbil tu k’iinil miércoles.

“Ka’atúul kajnáalo’ob kíimo’ob, uláak’ ka’atúulo’obe’ úuch loobti’ob ka’alikil táan u wa’awak’al ba’al tumen tuurko’ob” yóok’ol jump’éel kaaj tu lak’inil u xuul kaajil Ras Al Ain, beey tu tsolaj centro de coordinación de operaciones militares de las Fuerzas Democráticas Sirias (FDS).

Beey túuno’, ya’abach máako’obe’ táan u yáalkabo’ob ti’ le ba’ax táan u beeta’al tumen tuurko’ob.

Siria túune’ ku núukik xan yéetel ts’oon ku pulik tak Turquía.

Yanchaj xan kex waxakp’éel ba’al wáak’ ti’ tuurko kaajo’ob, ti’ p’aatalo’ob tu xuul kaajil; p’el ts’o’okik u káajsik xan u wak’ik ba’al Ankara tu yóok’ol kurdo ba’atelil táan u yúuchul tu nojol-lak’inil aarabéeil lu’umil.

Ichil ba’ax ts’o’ok u yojéelta’al tumen u kúuchil k’a’aytik péektsilo’obe’, Anatolia, wa’ak’ kex ka’ap’éel proyectil, ba’ale’ le je’elo’ ma’ tu beetaj loobilaj ti’ máak, chéen wa’ak’ tumen Unidades de Protección Popular (YPG).

Beey túun xano’, yanchaj uláak’ ba’al wáak’ tu k’íiwikil u kaajil Nusaybin, ts’o’okole’ ma’ ojéelta’al wa yaan wa máax úuch loob ti’. Ba’ax wa’ak’e’ ti’ jóok’ Qamishli, beeta’ab tumen kurda-siria jala’acho’ob.

Núuktajil beeta’ab tumen Ankara, ts’a’ab u k’aaba’ beey 'Operación Manantial de Paz', yéetel tu ts’áaj k’ajóotbil ti’ Twittere’ “múuch’kabil terrorista PYD - Partido de la Unión Democrática, u machmajubáaj ti’ YPG ti’al u páajtal u ts’oon- náak tak tu xuul kaajilo’ob Ceylanpinar yéetel Nusaybin yéetel ba’ax k’ajóolta’an beey proyectiles de mortero, ts’o’okole’ ma’ xan ojéelta’ab wa yanchaj wa máax úuch loobilaj ti’”.

Turco jala’achil, Recep Tayyip Erdogan, tu k’a’aytaj u káajal operación militar yóok’ol kurdas sirias k’atulino’ob, ts’o’okole’ tu ya¡alaj yaan u yilik u kaláantik u yutsil kaaj yaan tu tséel.