Ku je'ets'el tumen u Congresoil Yucatáne', u ka'ansal maaya t'aan ti' u xookil nivel básico

Graciela H. Ortiz
Oochel: Raúl Angulo Hernández
La Jornada Maya

U Congresoil Yucatáne’ tu jets’aj bejla’a miércolese’, u yantal u ka’ansal maaya t’aan ichil u jaatsil xook nivek básico, le ken káajak xook tuka’atéen ti’ le uláak’ ja’abo’, ts’o’okole’ yaan u káajal u beeta’al le ken ts’a’abak k’ajóoltbil ichil Diario Oficial del Estado.

Diputado’obe’ yaan u kaxantiko’ob ka xi’ik u ya’abtal jujump’íitil le ka’ansajo’, ba’ale’ le je’elo’ yaan u je’ets’el ti’ le ts’ook múuch’tambalo’ob bíin beeta’ak tumen Comisión de Puntos Constitucionales y Gobernación, ti’al u bin u ts’o’oksa’al u noj tuukulil yéetel ti’al ka páatak u táakbesa’al ichil taak’in bíin k’áata’ak tu ja’abil 2021, ti’al ka utschajak u meyaj tu beel.

Ma’ili’ úuchuk yéeytambale’, u diputadoil Morena Luis Loeza Pacheco yéetel u x legisladorail PAN Paulina Viana Gómez t’aanajo’ob tu yóok’lal; leti’obe’ tu k’áatajo’ob ti’ máaxo’ob táakano’ob ichil u múuch’kabilo’obe ka u yéeyo’ob u béeychajal u beeta’al le kaambalo’.

Loeza Pacheco tu tsikbaltaje’ u xookil máaxo’ob t’anik maaya tu lu’umil Yucatáne’ mantats’ táan u bin u yéemel ti’ le ts’ook ja’abo’oba’, beey bin jeets’el ti’ xaak’alilo’ob ts’o’ok u beeta’al tumen Universidad Nacional Autónoma de México (UNAM), ts’o’okole’ ichil jo’op’éel ja’abo’obe’ ya’ab máak ch’éen u t’anik maaya, tumen ka’ach tu ja’abil 2010e’ yaan 30.3 por ciento ba’ale’ ti’al 2015e’ chéen 28.89 por ciento.