De la Redacción
Oochel Rodrigo Díaz Guzmán
K'iintsil
Viernes 19 ti' mayo, 2017
Le 21 ti’ mayo ku náats’ala’, yaan u k’iimbesa’al u Máank’inal Jejeláas Miatsilo’ob, beey jets’a’an tumen u mola’ayil UNESCO, lik’ul u ja’abil 2001. Ku tukulta’ale’ k’a’anan ka yanak jejeláas miatsilo’ob, tumen jejeláas tukulo’ob yaan ti’ tuláakal yóok’ol kaab, ts’o’okole’ k’a’anan ma’ u p’a’atal paachil mix jump’éeli’ tumen tuláakal k’a’anantako’ob.
Beey túuno’, k’a’anan xan ka kaxanta’ak jump’éel noj tuukul, tu’ux u béeytal u táakbesa’al tuláakal miatsil, tumen beyo’ jujump’íitil ken béeyak u tsikbalta’al bix je’el u yantal jets’ óolal yéetel u jóok’sa’al táanil kaajo’ob, ka’alikil u na’atikubáaj jejeláas kaajo’ob kex tumen yaanal bix u tuukulo’ob.
Yo’olal le máank’inala’, yaan u beeta’al u meyajil Foro Académico Ciudad de México: lugar donde las culturas dialogan, lik’ul u k’iinil lik’ul 29 ti’ mayo tak 2 ti’ junio, ichil u cha’anil Feria Internacional de las Culturas Amigas (FICA).
Ti’e’ meyaja’, jóok’sa’an jo’o jaats: Jejeláas t’aano’ob yéetel tsikbal; noj kaaj, u kúuchil tu’ux ku yantal jejeláas tuukulo’ob; u chíimpolta’al jejeláas miatsilo’ob ti’ kúuchilo’ob k’a’aytaj péektsil; pat jo’ol tuukul yéetel miatsil, yéetel jejeláas miatsil yéetel its’at. Yaan u táakpajal mola’ayo’ob je’el bix Academia Mexicana de la Lengua, la Asamblea de Migrantes Indígenas de la Ciudad de México, la Asociación Mundial de Radios Comunitarias, Museo Franz Mayer, Museo de la Memoria y la Tolerancia, ichil uláak’o’ob.
Beyxan u múuch’kabil Movimiento Nacional por la Diversidad Cultural, tu’ux táakbesa’an jejeláas mola’ayo’obe’, tu líik’saj u t’aan tia’al ka chíimpolta’ak u páajtalil miaatsilo’ob, yéetel tia’al ka cha’abak u kuxtal kaaj je’el bix u tukultik.
U kaxanta’al uláak’ lu’umo’ob tia’al u kajtal máak chéen jump’éel ti’ le talamilo’ob yaan ikil u kaxanta’al meyaj yéetel u jóok’ol táanil. Táan u k’áata’al ka kaláanta’ak wíinik, je’el tu’uxak bíin yanak máak.
_____________________________________________
[b]Día Mundial de la Diversidad Cultural[/b]
El próximo 21 de mayo se conmemora el Día Mundial de la Diversidad Cultural, establecido en 2011 por la UNESCO, con el objetivo de superar la división entre las culturas y lograr su reconocimiento.
La cultura, es diversa y rica por sí misma, posee un valor intrínseco tanto para el desarrollo como para la cohesión social y la paz.
Al respecto, se harán actividades como el Foro Académico Ciudad de México: lugar donde las culturas dialogan, a realizarse del próximo 29 de mayo al 2 de junio, en el marco de la Feria Internacional de las Culturas Amigas (FICA), en Ciudad de México.
Por su parte, el Movimiento Nacional por la Diversidad Cultural, integrado por diferentes dependencias locales y federales, se pronunció por la defensa de las derechos culturales, la autodeterminación de los pueblos, su conservación y se difusión.
