Afp
Oochel Ap
K'iintsil
Beirut
Martes 6 ti' marzo, 2018
Walkila’ yanchaj kex 44 u túul máako’ob kíimo’ob uchik u wa’ak’al bombas tumen siirio’ob, yóok’ol u lu’umil Guta Oriental, le beetik k’uch tak 750 u túul kimen u xookil máaxo’ob ts’o’ok u loobilta’alo’ob, beey j ts’a’ab k’ajóoltbil lunes máanik tumen ONG OSDH.
U wa’awak’al ba’alo’obe’ beeta’ab tu chúumukil áak’ab yéetel tu píik’ sáastalil lunes, ti’ jayp’éel u kaajilo’ob Guta Oriental, lajun túul máak tu kíinsaj tu kaajil Hamuriye, tu’ux úuch ts’o’on yéetel barriles explosivos, beey je’ets’ik tumen Observatorio Sirio de Derechos Humanos (OSDH).
“Ya’ab ti’ máaxo’ob kíime’ jóok’sabo’ob tu yáanal ba’ax nika’an”, beey tu ya’alaj máx jo’olbesik múuch’kabil, Rami Abdel Rahmane.
Yéetel le je’elo’ ku náakal 739 máako’ob ts’o’ok u kíimilo’ob lik’ul 18 ti’ febrero, k’iin uchik u káajsa’al tumen sirio’ob loobilaj tu yóok’ol le lu’umo’, tu ya’alaj Rahman.
“Ti’al u sáastal lunese’ wa’ak ba’alo’ob ti’ ka’ab yéetel úuch ts’oon yéetel cohetes tu táan Guta”, u ts’ook tulumil insurgentes yaan tu joolil Damasco, tu ya’alaj Abdel Rahman.
“Ba’ax túuxta’ab wak’bil tu k’iinil 18 ti’ febrero chéen u káajbal ba’atelil túuxta’ab lu’um yéetel káajsa’ab tumen siirio’ob ti’al u ch’a’abal tuka’atéen Guta Oriental.
Muuk’e’ tu ch’a’aj tuka’atéen maanal ti’ jump’éel cuarto ti’ enclave x ma’ u’uyaj t’aan, tu ch’a’aj kex cien kilómetros cuadrados, ku ya’alik OSDH.
“K’a’anan ma’ u jáawal ba’ax ku beeta’al”, tu ya’alaj domingo Bashar al Asad.
[b]Ook tu lu’umil Guta yáax convoy ku yáantaj[/b]
Duma, Siria. Jump’éel convoy ti’ial u biinsa’al áantaje’ ook lunes máanik tu enclaveil Guta Oriental, naats’ ti’ Damasco, tu’ux ts’o’ok u palitsilta’al tu ts’ook k’iinilo’ob jayp’éel kaajo’ob uchik u ba’ateta’al insurgente’ob.
U muuk’ Bashar al Assad jets’ik bix u yúuchul ba’al ti’ bastión je’elo’ yéetel ku p’isik kex 100 km2 tak tu joolnajil Damasco, beey uchik u ya’alik Observatorio Sirio de Derechos Humanos (OSDH). Ba’atelil ts’o’ok u beeta’ale’, ts’o’ok u beetik u yantal kex 720 u túul máak kimen.
Consejo de Seguridad ti’ ONU tu k’áataj ka yanak “jach tu séebanil” jump’éel wa ba’ax tu’ux ka je’ets’ek ka yanak xaak’al yo’olal ba’atebil táan u beeta’al tumen sirio’ob yóok’ol enclave. Ts’íib j ts’a’ab tumen Reino Unido, je’ets’ yéetel 29 yéeyajilo’ob tuux táakpaj 47 Noj Lu’umo’ob, ichil le je’elo’obo’ 4 tu ya’alajo’ob ma’ yéetel 14 ma’ tu ya’alajo’ob mixba’al.
Yéetel u yáantajil Rusia, régimene’ táan u kaxtik u ch’a’ak tuka’atéen enclave tu’ux yaan 400 mil u túul kajnáalo’ob, máaxo’ob kaja’ano’ob sótanos ti’al ma’ u k’uchul loobilaj ku beeta’al, ts’o’okole’ ma’ ya’ab ba’al yaan ti’al jaantbil mix ts’aako’ob. “Metnal ti’ lu’um”, tu ya’alaj u máakilo’ob ONU.
Lunes máanika’ jump’éel convoy tu’ux yaan 46 u p’éel kis buuts’o’ob yéetel janal beyxan yéetel nu’ukulo’ob ti’al u ts’a’akal kex 27 mil 500 u túul máak, beey uchik u ya’alal tumen Coordinación de Asuntos Humanitarios (Ocha, yo’olal bix u k’aaba’ ich inglés).
U agencial ONU tu ya’alaje’ “ma’ cha’ab u túuxta’al ya’abach ba’alo’ob ti’al u yáanta’al máak”.
Yo’olal le je’el ts’o’ok u yúuchulo’, “óoxp’éel ti’ 46 u p’éel kis buuts’o’obe’ túuxtabo’ob Duma óoli’ mixba’al yani’”, tu ya’alaj u x meyajil Ocha en Damasco, Linda Tom.
U convoyilo’ob Media Luna Roja Siria yéetel Comité Internacional ti’ Cruz Roja (CICR), tu máansaj u ts’ook kúuchil xaak’al ku ts’a’abal tumen régimen, tu ya’alaj u aj meyajil AFP.
