Ap
Oochel: Ep
La Jornada Maya
Minneapolis, Estados Unidos
Martes 2 ti' junio, 2020
Jala’ach Donald Trump tu ya’alaj le lunes máanika’, je’el u túuxtik u ajk’atuno’ob Estados Unidos ti’ le noj lu’umo’ob tu’ux táan u yantal xwo’okinilo’obe’ ti’al beyo’ u séeb xu’ulsal tuláakal líik’saj t’aanilo’ob táan u yantal ti’ noj kaajo’ob, úuchak u t’aan u suku’un George Floyd, juntúul jboox máak kíinsa’ab jayp’éel k’iino’ob paachil, tu’ux tu k’áataj ka láaj je’ets’ek ba’al, tumen u k’askúunta’al ba’ale’ “ma’ táan u beetik u suut u yíits’in tuka’atéen”.
Tuláakal u t’aanil jets’ óolal beyxan ti’al ma’ u xu’ulsa’al xwo’okinilo’obe’ táan u yúuchul kex tumen táan ka’ach u chan ch’a’ak u yóol le lu’umo’, úuchak u máan xan u k’oja’anil coronavirus, yéetel tuláakal jela’an ba’alob k’axpaj tumen ya’ab máak p’áat mina’an meyaj ti’ob.
Beey túuno’, u jala’achil le noj lu’umo’, Donald Trump tu ya’alaj ti’ uláak’ u jala’achilo’ob Estados Unidose’ ka bin u k’a’abéetkunso’ob Guardia Nacional tuláakal le ku páajtale’ ti’al “u jéets’el bejo’ob”. Wa tumen jala’acho’obe’ ma’ táan u beetiko’ob mixba’ale’, tu ya’alaj Trumpe’ yaan u yilik “bix u ch’éensik le talamil tu yóok’lalo’ob”.
Trumpe’ ti’ t’aanaj tu kúuchil Rose Garden p’el jóoya’abtak gas lacrimógeno ti’ máaxo’ob ku líik’sik u t’aano’ob aktáan ti’ le kúuchilo’, tumen ti’ u much’majubáajo’ob ti’ k’íiwik naats’ yaan Casa Blanca.
