Paul Antoine Matos
Oochel Rodrigo Díaz Guzmán
K'iintsil
Jo’, Yucatán
Miércoles 11 ti' abril, 2018
Ti’al le ja’aba’, u kúuchil Centro Internacional de Congresos, Powered by Samsung, jts’a’ab k’ajóoltbil, le p’is k’iinil máanik tumen u jala’achil u noj lu’umil México, Enrique Peña Nieto, ts’o’ok u je’ets’el u beeta’al 17 u p’éel múuch’tambalo’ob, tu’ux tukulta’an u táakpajal kex mil 400 u túul máak, ba’ale’ ku kaxanta’al u táakbesa’al latinoamericano yéetel europeo máak, keetel yéetel mexicano’ob bayxan u kajnáalilo’ob Jo’, beey úuchik u je’ets’el tumen máax jo’olbesik comercial yéetel promoción, Harold Sanders, uchak u beeta’al jump’éel xíimbal tsikbal te’e kúuchilo’ yéetel kúuchilo’ob k’a’aytajil péektsilo’ob.
U yóol u jaatsil koonol yéetel péeksajil CIC ku kaxtik “u jaatsik” aj xíimbal máako’ob ku taalo’ob ti’ múuch’tambalo’ob ti’al ka jach jats’utschajak u yila’al Yucatán ba’ale’ beyxan le kúuchilo’ ti’al u xíimbalta’al, tu ya’alaj.
“Walkila’ táan kkaxtik kts’oon tu beel ti’al u chukik taak’in ku k’u’ubul ti’al tuláakal meyajo’ob bíin beeta’ak te’elo’, tumen k’a’anan u yila’al u suut tuka’atéen je’el bix u bin u k’a’abéetkunsa’alo’, leti’e’ ba’ax bíin p’i’isiko’”, tu ya’alaj.
Tu chíimpoltaj u nojba’alil CIC ma’atech u p’i’isil yo’olal jayp’éel meyajo’ob ku beeta’ali’, ku p’i’isil yo’olal beyka’aj taak’in ku yokol le kéen jo’op’ok u beeta’al wa ba’ax. Le beetik, jets’a’an tumen Fideicomiso de Turismo de Reuniones k’a’anan u xo’okol jaytúul máak ku k’uchul Yucatán yéetel ku p’áatalo’ob kex jump’éel áak’ab, beyxan jaytúul máak ku táakpajal yéetel ba’ax ba’alilo’ob ku k’a’abéetkunsa’al, tu ya’alaj.
Beey túuno’, yaan u kaxta’al u kóolal noj ba’alo’ob ti’al beetbili’, leti’e’ ba’ax ku seen beeta’al tumen Latinoamérica y Europa, tumen tu lu’umil Estados Unidose’ ba’alo’ob je’el bix le je’elo’ suuka’an u beeta’al chéen ichilo’ob, tu jets’aj. Yaan u kaxta’al u beeta’al múuch’tambalo’ob yo’olal toj óolal, tumen ya’ab máak ku táakpajali’, le beetik ma’alo’ob u lúubul taak’in yo’olal ba’alo’ob je’el bix le je’elo’ tumen ku k’a’abéetkunsa’al kúuchil ti’al u p’áatal máak, nu’ukulo’ob yéetel u facturarta’al le kúuchilo’, tu tsolaj.
U k’a’ayta’al CIC yaan u beelkunsa’al ti’ jayp’éel jatsilo’ob: yáaxe’, ka p’áatak u kúuchil u ko’onol u k’a’abéetkunsa’al CIC ti’ u Noj Kaajil México, tumen ka’ache’ ti’ táakbesa’an ichil Oficina de Congresos y Convenciones; u k’a’ap’éelile’, u ja’ajatsa’al u múuch’meyajil koonol, tu’ux ka yanak máax ku yilik koonol ti’ táanxel lu’umo’ob, le ku yilik le yaan u beeta’al tu noj lu’umil México, junjaats ku yilik koonol ku beeta’al te’e noj kaaja’ yéetel uláak’ tu’ux u ts’aatáanta’al tuláakal clientes.
Yéetel u jaatsil meyaj marketing yaan u ts’aatáanta’al ka’ap’éel ba’alo’ob: kúuchilo’ob k’a’aytik jets’a’an ba’alo’ob ti’ ju’un yéetel digital marketing, tu ya’alaj.
U nooyil meyaj CIC ti’ le yáax winalo’, leti’ u beetik jump’éel kúuchil administración séeba’an u meyaj, tu’ux ka béeyak u séeb majáanta’al yéetel u séeb ko’onol; le kéen u chuk wakp’éel winalo’obe’, unaj ts’o’ok u káajal u meyaj tu k’iinilo’ob tu’ux ku jach ya’abatal u k’uchul aj xíimbal máako’ob yo’olal múuch’tambalo’ob, ichil u winalilo’ob septiembre yéetel diciembre, tumen je’el bix ts’o’ok u chan ya’abta’al u ko’onol u k’iinil u k’uchul máak meyaj te’elo’, u k’a’ananil walkila’ leti’ ka séeb beeta’ak u meyajil, tu ya’alaj.
Le kéen máanak jump’éel ja’abe’, ku kaxanta’al u ya’abtal meyaj u beetej yéetel u ya’abkunsa’al taak’in ku yokol ti’ u kúuchil Centro Internacional de Congresos ba’ale’ beyxan ti’ Yucatán; ti’al jo’op’éel ja’abo’obe’ ku kaxta’al u p’áatal beey u yóox k’a’anan kúuchil, u ya’abtal tak 30 por ciento u noj meyajilo’ob táanxel lu’umo’ob, tu ya’alaj.
