Oscar Rodríguez
Oochelo'ob capturas de pantalla
Jo’, Yucatán
Lunes 9 ti' abril, 2018
Uchak u chaknúultikubáaj juntúul porno xbeet balts’am tu k’íiwikil u noj kaajil Jo’, tu píiksáastalil sábado máanik, yéetel uchak u ts’a’abal k’áajóoltbil ti’ redes socialese’, u jala’achil u noj kaajil Jo’e’ táan u kaxtik bix je’el u páajtal u je’ets’el si’ipil tu yo’olal, yéetel xan u beetik takpool tu táan Fiscalía General del Estado, tumen ku tukulta’ale’ je’el u yantal si’ipil uchak u k’i’itbesa’al jayp’éel ba’alo’ob ti’ Internet yéetel ti’ redes sociales.
Tu taal u sáastal sábado máaniko’, mexicana xbeet balts’am ti’al nojoch máako’obe’, Mia Marín, tu ts’áaj k’ajóoltbil ti’ redes sociales jump’éel kóom cha’an, 31 segundos ku xáantal, tu’ux ku chikpajal bix u pitik jump’éel túulis boox nook’ u búukintmaj ka’achij. Cha’ane’ jts’a’ab k’ajóotbil ti’ jejeláas cuestasil redes sociales.
Ojéelta’abe’, ba’ax tu beetaj xbeet balts’ame’, chéen u chuuka’anil jump’éel ba’ax tu k’a’aytaj ti’ jump’éel bar ti’al xiibo’ob, p’aatal tu bak’pachil u kaajil Jo’.
Le beetik, u jala’achil noj kaaje’ tu ts’áaj ojéetbil ti’ jump’éel k’a’aytajil ts’íibe’, u Kananil u kaajil Jo’e’ táan u beetik ba’ax k’a’anan ti’al u je’ets’el u si’ipil juntúul ko’olel tu pitaj u nook’ tu pik’sáastal, tu chúumukil Plaza Grande.
Comandante Mario Arturo Romero Escalante tu ya’alaje’ yaan u mu’uk’ankúunsa’al kananil ku beeta’al lalaj áak’ab te’e’ k’íiwiko’ ti’al ma’ u yúuchul tuka’atéen ba’alo’ob je’el bix le je’elo’ yéetel ti’al u beeta’al ba’ax jets’a’an tumen Policía y Buen Gobierno ti’ u noj kaajil Jo’.
Beey túuno’, máax jo’olbesik Gobernación, Guibaldo Vargas Madrazo, tu ts’áaj ojéeltbil mola’ay ku jo’olbesike’ táan u xak’al tukultik u beetik tak pool tu táan Fiscalía General del Estado ti’al ka je’ets’ek tumen Unidad Especializada en Delitos Cibernéticos ba’ax si’ipil yaan uchak u k’i’itbesa’al ti’ redes sociales cha’ano’ob ma’ unaj u ye’esa’alo’obi’.
K’a’anan u ya’alal xane’, ju’un túuxta’ab tumen ayuntamientoe’ ma’ xan táan u sáasilkúunsik máakalamáak u jaatsil a’almaj t’aano’ob ma’ jchíimpoolta’ab tumen Mia Marín, mix tech u je’ets’el ba’ax si’ipil tu beetaj ti’al u ta’akal u pool tu táan FGE.
