Afp
OOchel Academia Mexicana de Cinematografía
K'iintsil
Lunes 26 ti' marzo, 2018
Toulouse.
U cha’anil Cinelatino de Toulousee’ tu chíimpoltaj viernes máanike’ jump’éel jats’uts cha’an yo’olal u jejeláasil k’aay cardenche tu lu’umil México, te’e súutuko’ chíimpolta’ab xan jump’éel argentino cha’an yo’olal u beeta’al u yóol wíinik ts’o’okole’ k’a’ajsab óoxtúul máako’ob táan ka’ach u kaniko’ob ba’al yo’olal cine ba’ale jsa’atbesa’abo’ob tu lu’umil México.
Táankelem jpat meyaj Daniel Hernández tu k’áataj ti’ mexicano jo’opóopilo’obe’ ka séeb kaxta’ak u yóoxtúulil u yéet jkaambalo’ob Guadalajara, máaxo’ob jma’acho’ob tumen jts’oon máako’ob ka’alikil táan u suuto’ob ti’ jump’éel táabsaj meyaj tu kaajil Tonalá, Jalisco.
Ka’alikile’, tu lu’umil Méxicoe’, jbeet cha’ano’ob Alfonso Cuarón yéetel Emmanuel Lubezkie’ tu táakmuk’tajo’ob sábado máanik líik’saj t’aan ku k’áatik ka kaxta’ak óoxtúul xoknáalo’ob.
[b]Oksaj saajkil ti’ táankelemo’ob[/b]
“Walkila’ u sajbe’entsil k sa’atbesa’al wa kkíinsa’al tumen táankelemo’on, xoknáalo’on wa jbeet cha’ano’one’ asab séeba’an u yúuchul”, beey tu ya’alaj uláak’ juntúul máax jo’olbesik u kóomcha’anil [i]Las raíces del roble[/i].
“Kuxa’an úuchik u biinsa’alo’ob, kuxa’an kk’áat ka’aj su’utuko’ob”, tu ya’alaj xan Hernández, tu ts’áaj xan u muuk’ ti’ táankelemo’ob tu líik’saj u t’aano’ob tu lu’umil Guadalajara, beyxan jbeet cha’an mexicano Guillermo del Toroe’ tu k’i’itbesaj ba’ax ku k’áata’al ti’ u kúuchil Twitter.
Beey túuno’, Cuarón yéetel Lubezkie’ tu joronts’íibtaj u k’aaba’ob ti’ ts’íbil ju’un túuxta’ab ti’ u jala’achil u lu’umil Jalisco, Jorge Aristóteles Sandoval tu’ux ku ya’alik le je’ela’: K k’áatik ti’ tuláakal u jala’achilo’ob u kaajil, u petenil yéetel u noj lu’umil México: ka yanak u séeb péeko’ob ti’al u kaxta’al kuxa’antak óoxtúul xoknáalo’ob Javier Salomón Aceves Gastélum, Daniel Díaz yéetel Marcos Ávalos; beyxan ka je’ets’ek u muuk’ a’almaj t’aan tu yóok’ol máaxo’ob beet k’aasil ikil u ma’acha’al máak, yéetel ku chíimpoltik: ma’ u yantal uláak’ sa’atbesajilo’ob.
Tak walkila’ ma’ ojéela’an tu’ux ts’oka’an táankelem xoknáalo’ob ti’ Universidad de Medios Audiovisuales, táan ka’ach u suuto’ob ti’ jump’éel táabsaj tu beetajo’ob Tonalá. Ichil ba’ax ku ya’alal tumen máax ile’, kis buuts’ tu’ux ku máano’ob ka’ache’ k’aschaji le beetik ka’aj je’el u yutskíinso’obe’ jma’acho’ob ichil u muuk’ kex waktúul yéetel waxaktúul máako’ob.
Chíimpolal ti’al u cha’an jach ma’alo’obil beeta’ane’, jk’u’ub ti’ mexicano cha’anil A morir a los desiertos beeta’an tumen española Mata Ferrer, máax meyajnaj kex jo’op’éel ja’ab yéetel junmúuch’ cardenchero máako’ob ti’ u lu’umil Méxio.
Ferrer, 35 u ja’abil, kaja’an México lik’ul u ja’abil 2006 ti’al u kanik ba’al ti’ cine, ka’alikil u xooke’ tu k’ajóoltaj cardenche ti’b YouTube, k’aay suuk u beeta’al. Jump’éel ba’al séeb úuchik: tu péeksaj in wóol, tu ya’alaj ti’ Afp.
[i]Primas[/i], beeta’an tumen argentina Laura Bari, tu tich’aj chíimpolal ku k’u’ubul tumen Asociación Católica Mundial para la Comunicación. Leti’e’ kaja’an tu kajil Montreal, u kit ka’atúul ti’ máax ku chikpajal te’elo’, juntúul ti’ le je’elo’obe’ violarta’ab yéetel tóoka’ab ka’alikil 10 u ja’abil tumen juntúul máak, uláak’ juntúule’ loobilta’ab xan ka’alikil yaan kex 9 wa 12 u ja’abil.
