Agencias / De la Redacción
Oochel ch'a'ab tu cha'anil jo'olbesa'ab tumen Sebastián Hoffman
K'iintsil
Martes 30 ti' enero, 2018
Mexikana cha’an [i]Tiempo compartido (Time Share)[/i], jo’olbesa’an tumen Julio Chavezmontes, máax múul ts’íibt yéetel Sebastián Hofmann (u productorile’), chíimpolta’ab beey u asab ma’alo’obil guión tu cha’anil Festival de Cine de Sundance. Ba’ale’ u jach nojochil chíimpolal je’ets’ tumen u múuch’il yéeyaj máako’obe’ j ts’a’ab ti’ u ch’a’anil [i]The Miseducation of Cameron Post[/i], jo’olbesa’an tumen Desiree Akhavan, tu’ux ku ye’esa’al jump’éel terapia ti’al u su’utul máak gay.
Ti’ u cha’anil [i]Tiempo compartido[/i], ku chikpajal Luis Gerardo Méndez, Miguel Rodarte yéetel RJ Mitte, le u ts’ooka’ k’ajóolta’an uchik u beetik Walter White Jr. ichil u serieil Breaking Bad, cha’ane’ ch’a’achita’ab tumen kúuchilo’ob k’a’aytajil péektsilo’ob uchik u ts’a’abal k’ajóoltbile’, tu’ux j a’alabe’ jump’éel cha’an jach ma’alo’ob ti’al cha’antbil ts’o’okole’ “jump’éel thriller sicológico k’alik a tuukul ti’al ma’ u cha’ak a péek tu’ux kulukbalech”.
Le cha’ano’ ku chikbesik ka’atúul máako’ob ku taaktal u tokik u baatsil tu k’ab jump’éel ki’ichkelem kúuchil ku ts’a’abal bin tumen jump’éel ayik’al mola’ayil, yaan u k’i’itbesa’al yéetel u chíikulal Piano tu ka’a chúumukil le ja’aba’.
[b]Ts’a’ab k’ajóoltbil tu cha’anil Guadalajara[/b]
Walkila’ táan u ketikubáaj yéetel u k’a’ananil cha’an Rotterdam yéetel yaan u ts’a’abal k’ajóoltbil México ichil u 33 téenal u beeta’al u cha’anil Festival Internacional de Cine tu lu’umil Guadalajara 2018, yaan u beeta’al 9 tak 16 ti’ marzo.
Tu cha’anil [i]The Miseducation of Cameron Post[/i], ku chikpajal Chloë Grace Moretz, jach ma’alo’ob uchik u k’a’amal uchak u ts’a’abal k’ajóotbil tu wiitsilo’ob Utah, tu’ux ku chikpajal u tsikbalil juntúul x lo’obayan ch’úupal ku yantal u bin terapias uchak u yila’al táan u beetik sexo yéetel u x ajawil jump’éel graduación.
Tu k’aaba’ tuláakal máaxo’ob meyajnajo’on te’e cha’ana’ taak k k’ubik le chíimpolala’ ti’al u kaajil LGTB láayli’ kuxa’an kex ts’o’ok u máan ti’ terapia ti’al u k’e’exelo’ob, tu ya’alaj Moretz. Desiree Akhavan tu p’ataj ka’ach jump’éel chan k’uben t’aan ba’ale’ ma’ páatchaj u yu’ubali’.
[i]Kailash[/i], tu’ux ku chikpajal u tsikbalil juntúul máak ku meyaj tia’al u xu’ulsik palitsil mejen paalal, chíimpolta’ab beey u jach ma’alo’obil documental estadunidense, ka’alikil u chíimpolal aj cha’anil máako’ob ti’al u jach ma’alo’obil cha’an te’e noj lu’umo’ j k’u’ub ti’ [i]Burden[/i], beeta’an tumen Andrew Heckler.
U chíimpolal ti’al u jach ma’alo’ob jo’olbesajil documental Estados Unidose’ j k’u’ub ti’ Alexandria Bombach yo’olal On Her Shoulders, tu’ux ku ye’esa’al u yoochel yazidi x ch’úupal kuxlaj kex sexual palitsilta’an tu k’ab Estado Islámico, ka’alikil u chíimpolal aj cha’anil máako’ob ti’ le jaatsila’ j k’u’ub ti’ The Sentence, beeta’ab tumen cineasta estadunidense sijnáal México Rudy Valdez.
U cha’anil Sundance, ts’o’ok ka’awjeak, patjo’olta’ab tumen Robert Redford yéetel suuk u beeta’al lalaj enero tu wiitsilo’ob Park City, Utah. Noj chíikulal ti’al u cha’ano’ob yéetel ya’abach juntéenake’ máaxo’ob ku náajalo’obe’ ku yantal ya’abach ba’alo’ob ti’al tsikbaltbil tu yo’olal.
