Ts'íib yéetel oochel Fernando Eloy
K'iintsil
Yucatán
Lunes 29 ti' enero, 2018
Maanal ti’ 140 u túul máako’ob, ichil cinematógrafos, técnicos yéetel aj balts’amo’obe’ táan u meyajo’ob ti’al u beeta’al yáax chowakcha’anil tu’ux chéen aj its’ato’ob yéetel inversioniasta’ob sijnáalo’ob Yucatán ku táakpajalo’obi’, tak tu chúumukil mayo’e’ yaan u ta’absa’al u jejeláasil ba’alo’ob tu méek’tankaajilo’ob le noj lu’uma’ yéetel tu kaajil Jo’.
Lik’ul u káajbal enero, ti’ u bejilo’ob u baantail Chuminópolis, kajnáalo’obe’ tu yilajo’ob u nu’ukulo’ob je’el bix cámara’ob, áantaj máako’ob, sáasilo’ob yéetel aj beet balts’amo’ob jo’olbesa’ano’ob tumen Rommel Treviño, ikil táan u beeta’al u cha’anil Miedos, tumen u mola’ayil Imalogic.
Pik’ilju’una’ páatchaj u yilik u káarpetail producción yéetel jayp’éel ti’ u kúuchilo’ob tu’ux táan u yúuchul ta’absaj, tu’ux ku ya’alal cha’ane’ “táan u ch’a’ak u yóol ch’ena’an yéetel saajakil ti’al u cha’anta’al tu lu’umil México, tumen jump’éel meyaj táan u beeta’al tumen jumpáayil máako’ob yéetel túumben máaxo’ob meyajtik cha’an”.
“Maanal ti’ 30 u p’éel kúuchilo’ob tu’ux bíin úuchuk ta’absaj Yucatán, tu’ux ku yila’ale’, jump’éel ba’ax k’a’anane’ leti’e’ tu’ux ku ch’a’abal u tuukul personaje’ob ti’al u yúuchul u tsikbalil ts’o’okole’ ikil u bin u cha’antale’ ma’atech u k’a’abéetkunsa’al efectos especiales”, ku ya’alik u ju’unilo’.
Tu lu’umil Yucatáne’ ts’o’ok u beeta’al uláak’ cha’ano’ob je’el bix “Antes del anochecer”, jo’olbesa’ab tumen Julián Schnabel; wa “Song to song”, beeta’ab tumen Terrence Malik. Beyxan beeta’ab u cha’anil “Xibalbá” ti’ jayp’éel kúuchilo’ob le noj lu’uma’, tu’ux táakpaj invesionista’ob yéetel aj beet balts’am ku taalo’ob ti’ u chúumukil u noj lu’umil México. Ba’ale’, tak walkil ka’acha’ mix juntéen yáax beeta’ak jump’éel meyaj tu’ux ka laj beeta’ak u meyajil tumen yukateko’ob, je’el bix u cha’anil [i]Miedos[/i].
Tu k’iinilo’ob le p’is k’iinil ku taala’, ichil ba’ax xak’alta’ab yéetel u meyajil máako’ob produccióne’, yaan u yúuchul meyaj ti’ mejen haciendas yaan tu bak’pachil Jo’ yéetel uláak’o’ob yaan tu méek’tankaajil Yucatán, tu’ux yaan u chikpajal junmúuch’ paalal ku líik’ilo’ob tu ja’abilo’ob 1990.
Ichil máaxo’ob péektsiltik le meyaja’ ti’ yaan Diego Torres yéetel Justo Medina, máaxo’ob ts’íibt u guiónil, Jerry Rojas máax jo’olbesik u meyajil ta’absaj, diseñadora Rocelia Evans yéetel productor Gabriel Ximénez, ichil uláak’o’ob.
