La Jornada Maya
Oochel Captura de pantalla App Kaanbal
Cancún, Quintana Roo
Viernes 19 ti' enero, 2018
Tu mejen kaajilo’ob Quintana Roo, u xoknáalilo’ob secundaria yéetel bachillerato ku xak’altiko’ob jejeláas ba’alo’ob yo’olal kaambesajil ti’ nu’ukbesajo’ob tu’ux ma’atech u k’a’abéetkunsa’al Internet ti’al ka béeyak u yokolo’ob Kaanbal, jump’éel meyaj patjo’olta’an tumen Kaanbal Innovación Social, múuch’kabil x ma’ bo’olil u meyaj. Ku kaxtik u ts’áak u páajtalil ti’ mejen kaajo’ob tu’ux ma’atech u k’uchul wa mina’an Internet, ti’al u yokol u xak’alto’ob jejeláasa ba’alo’ob.
Ti’ le ts’ook ja’abo’obo’, nu’ukbesajo’ob je’el bix le je’ela’ ts’o’ok u túumbenkunsiko’ob bix u yúuchul ka’ambesaj yéetel bix u ka’anal ba’al yóok’ol kaab, ti’al ka yanak u jejeláasil bix u kaambal máak x ma’ bo’olil wa yaan jump’éel u nu’ukulil ka u ch’a’a Internet. Ba’ale’, ichil ba’alo’ob ts’o’ok u chikpajal ti’ xaak’al beeta’an tumen Internet Society, yaan kamp’éel billonesil máako’ob yóok’ol kaab mina’anti’ob Internet, le beetik ma’atáan u páajtal u yantal ti’ob nu’ukbesajo’ob x ma’ bo’olil je’el bix le je’elo’, le óo’lal ku yantal noj xáak’ab yo’olal tecnología yéetel kaambesajil.
Emprendedores Pedro Antonio González Martínez yéetel Camilo Olea García, ka’atúul máako’ob patjo’ol nu’ukbesaj yéetel máaxo’ob táaka’ano’ob Cámara Nacional de la Industria Electrónica, Telecomunicaciones y Tecnologías de la Información (Canieti), tu ya’alajo’obe’ u k’áat u beeto’ob nu’ukbesajo’ob ti’al ka p’íitchajak noj xáak’ab yaan yo’olal tecnología yéetel kaambal ti’ mejen kaajo’ob.
“K múul meyaj ichil múuch’kabilo’ob kaambal yéetel uláak’o’ob meyajtik informática ti’al ka’aj táakmuk’ta’ak túumben nu’ukbesajo’ob kaambal, beyxan ti’al ka péektsilta’ak u kaláanta’al miatsil yéetel u ma’alo’obkúunsa’al u kuxtal kaajo’ob”, tu ya’alaj Olea García. “Beey uchik u yúuchul ka’aj béeychaj u nu’up’ul meyaj yéetel Internet Society ti’al u péektsilta’al ka k’a’abéetkunsa’ak tecnología ti’ mejen kaajo’ob México”, tu ya’alaj.
