Juan Manuel Contreras
Oochel Rodrigo Díaz Guzmán
K’iintsil
Portugués, káastelan yéetel maya t’aane’, múuch’o’ob tu k’íiwikil Santa Lucía, uchak u beeta’al u múuch’ tsikbalil La Torre de Babel: Encuentro con el Otro, meyaj beeta’an tumen u xookil humanidades ti’ Universidad Modelo ichil jump’éel múul meyaj yéetel u ayuntamientoil u kaajil Jo’, yo’olal u k’iimbesajil 476 ja’abo’ob yanak le noj kaaja’.
Xooke’ beeta’ab tumen x ka’ansaj Rosane María Cardoso, máax sijnáal Brasil yéetel ka’atúul mexicano’ob aj ts’íibo’ob, Luis Armenta Malpica yéetel Jorge Miguel Cocom Pech. Beyxan, paaxanaj juntúul ko’olel jach k’ajóolta’an, Ruth Bennet, máax ku táakpajal tu múuch’paaxil Orquesta Sinfónica de Yucatán (OSY).
Múuch’ tsikbale’ ku kaxantik u nup’ik k’aay tuukul, paax yéetel t’aan; ba’alo’ob ku yu’ubik tu kuxtal máak sáansamal. Leti’e’ yáax xookil ku beeta’al ich óoxp’éel t’aano’ob, ts’o’okole’ ku kaxanta’al ka utschajak tu xikin máak ba’ax ku yu’ubik. Yáax u juumilo’ob ich maaya t’aan u’uya’ab, ts’o’okole’ u’uya’ab portugués yéetel káastelan, ka’alikil xane’ láak’inta’abo’ob yéetel u paaxil arpa.
Te’e súutuko’ táakpaj maanal ti’ 150 u túul máako’ob, aj ts’íibo’obe’ tu xokaj u meyajo’ob yéetel uláak’ u ts’íibilo’ob.
Rosane María Cardoso x ka’ansaj sijnáal Río Grande, ku ts’áak xook tu noj najil xook Universidad de Santa Cruz; Luis Armenta Malpica táakpaj ti’ Consejo Estatal para la Cultura y las Artes de Jalisco. Walkila’ ku jo’olbesik Mantis Editores. Maaya ts’íib Jorge Miguel Cocom Pech, xooknaj tu noj najil xook Escuela Normal de Profesores de Calkiní, Campeche, ichil uláak’ kaambalo’ob.
