Rosalía A. Villanueva
Oochel: Mariana Hernández León
K'iintsil
Martes 9 ti' enero, 2018
U noj lu'umil México
Ti’al u béeytal u much’ik taak’in ka’aj k’a’abéetkunsa’ak ti’al u jel beeta’al najo’ob tu noj lu’umil México, uchak u tíita’al lu’um 19 ti’ septiembre máaniko’, yaan u beeta’al Baila por México, tu k’iinil jueves 11 tu kúuchil Salón Los Ángeles ti’ u noj kaajil México, meyaj jo’olbesa’an tumen u yáax x óok’otil ti’ u múuch’il Staatsballet Berlín, Elisa Carrillo.
Ti’ jump’éel k’a’aytajil ts’íibe’, x óok’ot Elisa Carrillo tu ts’áaj k’ajóoltbil taak’in kéen múuch’uk ti’ u meyajil Baila por México yaan u mu’uch’ul yéetel le mola’ay láayli’ beey u k’aaba’o’, tu’ux k’uba’an xan áantaj tumen lu’umo’ob je’el bix Europa yéetel Estados Unidos, ti’al u béeytal u káajsa’al u líik’sa’al yáax lajun p’éel najo’ob ti’ u méek’tankaajil Otumba, tu lu’umil México, tu’ux je’etse’ yanchaj óoxlajuntúul máak kíim uchik u péek lu’um, ts’o’okole’ tu beetaj ya’abach loobilajil.
Tu nu’ukbesajil Baila por México yaan u táakpajal x óok’ot sijnáal México yéetel u yíicham Mikhail Kaniskin, u yáax j óok’otil Staatsballet Berlín.
Elisa Carrilloe’ Texcocoil, ti’ u noj lu’umil México. Tu patjo’oltaj le meyaja’ ti’al u táakpajal je’el máaxake’, beyxan aj óok’oto’ob jach kaambanaja’ano’ob yéetel amateurs taak u yáantajo’ob.
Ichil ba’ax ku je’ets’el tumen u múuch’kabil Fundación Elisa Carrillo Cabrera, Baila por México, yaan u beeta’al 18 horas tu kúuchil Salón Los Ángeles, yaan u káajal yéetel jump’éel u meyajil ballet clásico jo’olbesa’an tumen u aj óok’otilo’ob Staatsballet; le kéen ts’o’okoke’ yaan u yantal paax yéetel yaan u pa’axal yéetel u yóok’osta’al u jejeláasil paaxil, je’el bix mambo, chachachá, danzón, tropical, salsa yéetel cumbia.
Carrillo, máax kaaj u kaambal Escuela Nacional de Danza Clásica y Contemporánea ti’ Instituto Nacional de Bellas Artes ka’alikil bolonp’éel u ja’abile’, tu ts’áaj k’ajóoltbile’, ichil u ja’abil 2018e’ yaan u beetik jayp’éel óok’oto’ob ti’ le noj lu’uma’ ba’ale’ yaan u láak’inta’al tumen uláak’ aj óok’oto’ob jach k’ajóolta’ano’ob.
U tuukulil Baila por México leti’ ka béeyak u mu’uch’ul taak’in ku ts’a’abal tumen máaxo’ob táakmuk’tik le meyajo’ yéetel ikil u ko’onol boletos ti’al u cha’anta’al, tumen táan u kaxanta’al ka ka’ap’éelkunsa’ak taak’in yáax ts’a’aban tumen Fundación Elisa Carrillo Cabrera.
Yaan u xuul jaytúul máak ku páajtal u cha’antik, le beetik k’a’anan u yantal boletos ku ts’a’abal tu kúuchil Salón Los Ángeles wa Must Wanted Group (Campos Eliseos 305, Polanco), mola’ay táan u múul jo’olbesik le meyaja’ yéetel x óok’ot.
Septiembre ti’ le ja’ab máaniko’, Elisa Carrillo tu beetaj u cha’anil x ma’ bo’olil PopUpExperiencie México tu kúuchil Ex Convento de San Hipólito, tu’ux u yóok’ostaj Multiplicidad de formas del silencio y del vacío, patjo’olta’an u péeksajil tumen Nacho Duato, yéetle u paaxile’ u ti’al Johann Sebastian Bach, beyxan tu ts’áaj k’ajóoltbil Soledad, patjo’olta’an u péeksajil tumen ruso Alexander Abdukarimov yéetel u paaxile’ u ti’al Michael Nyman.
