AP
K'iintsil
Martes 3 ti' diciembre, 2019
Nueva York.
U k’éexel yóok’ol kaab, u loobilta’al máak yéetel ts’oon, bix táan u yúuchul ba’al ichil democracia yéetel tak chan chi’ichnak ba’al k’aaba’inta’ab beey Forky áantajnajo’ob ti’al u táakmuk’tiko’ob u seten kaxta’al te’e ja’aba’ u t’aanil “existencial” ichil u kúuchil kaaxan Dictionary.com.
Le ba’ax chikpaja’ ku ye’esik bix máanik u winalilo’ob u ja’abil 2019 tumen wíinike’ kuxlaj ichil u saajkilil u yúuchul wa ba’ax k’aasil yéetel talamil kex tumen yaan k’iine’ jaaj, jach talam yanik ba’al, ba’ale’ beyxan yaan k’iine’ chéen beey u tsikbalta’al tumen u kúuchilo’ob k’a’aytik péektsilo’ob.
“Ichil ba’ax yaan ti’ k daatose’, ku chikpajal u tuukulil u kaxta’al bix ma’ u ch’éenel u xíimbal máak”, beey úuchik u ya’alik John Kelly, máax beetik u editoril le kúuchil xaak’alo’.
Asab ya’ab u téenal úuchik u kaxta’al le t’aana’ ti’ Dictionary.com, úuchik u ts’a’abal k’ajóoltbil péektsilo’ob tu’ux sen eelnaj k’áaxo’ob yéetel úuchik u máak u chak ik’al Dorian, beyxan ka’a ts’o’ots’ona’ab máak tu kaajilo’ob Christchurch, Nueva Zelanda, yéetel El Paso, Texas. Beyxan táakbesa’ab ichil ba’ax seten tsibalta’ab ti’ jala’achil meyaj yéetel ti’ cultura pop, tu’ux táakbesa’an chan ba’al k’aajóolta’ab beey Forky, sak nu’ukul ku meyaj ti’al u yúuchul janal chikpaj ti’ u cha’anil Toy Story 4, tumen leti’e’ jach oka’an tu tuukule’ mina’an u beelal, tak le ken u na’ate’ chéen jump’éel báaxal.
