Notimez
Oochel AFP
K'iintsik
México
Lunes 25 ti' noviembre, 2019
Tu chowakil junk’aal ja’abo’obe’, jach ma’alo’ob úuchik u k’a’amal xíimbal e’esajil moodáa, ba’ale’ walkila’ Victoria's Secret, mola’ay meyajtik u nook’il leenseriae’ siijil tu lu’umil Estados Unidose’, tu jets’aj ma’ táan u beetik xíimbal e’esajil ti’ le ja’aba’ tumen táan u máansik talamilo’ob tu yóok’lal taak’in yéetel táan u yantal x wo’okinil yaan ba’al u yil yéetel u péeksajil #MeToo.
Ba’ax je’ets’e’ táanili’ u yila’al yaan u yúuchule’, tumen ts’o’okili’ u chan ch’éenel u yuumil máax cha’antik u xíimbalil e’esajil ki’ichpan ko’olelo’ob u búukintmajo’ob mejen nook’o’ob, yáax beeta’ab tu ja’abil 1995 yéetel tuláakal ku k’a’ayta’al ti’ tuláakal yóok’ol kaab.
Tu ja’abil 2014 “aangelo’ob” jach ki’ichpantako’ob táaka’ano’ob ti’ le mola’ayo’, tu beetajo’ob u cha’antalo’ob ti’ u máabenil cha’an kex tumen maanal ti’ nueve millonseil máako’ob ti’ u lu’umil Estados Unidos. Beey túuno’, ti’al u ja’abil 2018e’, chéen yanchaj 3.3 millonesil máako’ob cha’antej.
Tu k’iinil jueves ka’aj k’a’ayta’ab ma’atáan u beeta’al xíimbal e’esajil. Ts’a’ab k’ajóoltbil tumen máaxo’ob jo’olbesik u noj mola’ayil, L Brands, leti’obe’ láak’inta’abo’ob tumen máako’ob xak’ailtik bix yanik u taak’inil le mola’ayo’, tu’ux chikpaje’ ma’ utsil binik ti’ob ti’ le ts’ook óoxp’éel winalo’obo’.
“Yaan k tsikbal xan yéetel máaxo’ob manik ba’alo’ob ti’ to’on, ba’ale’ ma’ táan u beeta’al mix ba’al je’el bix le xíimbal e’esajilo’”, beey tu ya’alaj máax jo’olbesik finanzas, Stuart Burgdoerfer.
Leti’e’ tu jets’aj xan u mola’ayil Victoria's Secrete’, suuka’an ka’ach u chikbesik glamur, yéetel ku t’anik meyaj supermodelos je’el bix Gisele Bündchen wa Naomi Campbell, ba’ale’ tak walkila’ ma’ béeyak u jóok’ol táanil kex ts’o’ok u beetik jayp’éel k’eexilo’ob ichil máaxo’ob jo’olbesik k’a’anan meyajo’ob te’elo’.
Koonol tu beetaj mola’aye’, chéen p’el máanik ti’ mil millonesil dólares ti’ u ts’ook óoxp’éel winalo’ob u ja’abil 2019, le je’elo’ tu chikbesaj éem 7 por ciento ti’ le beyka’aj yanchaj láayli’ ti’ le winalo’obo’ ba’ale’ ti’ u ja’abil 2018. Beyxan tu winalil febrero máaniko’,j maanal ti’ junk’aal kúuchilo’ob koonol yanchaj u k’a’alalo’ob.
Beey túuno’, le ba’ax táan u yúuchula’ tu beetaj u yéemel xan ba’ax chikpaj ti’ u ts’ook óoxp’éel winalo’ob ichl u mola’ayil L Brands, tumen ti’ Victoria's Secret u taal u ya’abil ba’ax ku náajaltik. L Brandse’ tu ts’áaj k’ajóoltbile’ ch’éen u náajaltik 252 millonesil dólares.
Táan u jach xak’alta’al túumben nu’ukbesajo’ob ti’al meyajtbil
Óoli’ beey táan u bo’otik u si’ipil Victoria's Secrete’, tumen ya’abach juntéenake’ yanchaj u x wo’okin tsikbal úuchik u mu’uk’ankúunsa’al u tuukulil “ko’olele’ jump’éel ba’al”, ts’o’okole’ úuchik xan u k’éexel tuukulo’ob tu’ux ku k’áata’al ka yanak u jejeláasil kuxtal máako’ob yéetel tumen xan káaj u ka’ap’éel tukulta’al ba’ax no’oja’an u yúuchul yéetel modelos.
