AFP
Oochel Reuters
K'iintsil
Pekín, China
Jueves 21 ti' noviembre, 2019
Te’e k’iino’oba’ jts’a’ab k’ajóotbil jump’éel kúuchil ti’al u yu’uk’ul ki’ ba’al, chéen ba’axe’ beeta’an uti’al aalak’o’ob, tu noj lu’umil China, tu’ux ken biinsa’ako’obe’ ku bo’onol u wíinkilalo’ob sak yéetel boox ti’al u p’áatalo’ob óoli’ je’el bix juntúul paandáa, le beetike’ ts’o’ok u yantal u x wo’okin tsikbal ti’ Internet, yóok’lal bix unaj u ti’alinta’al le ba’alche’obo’.
Cute Pet Games u k’aaba’ le kúuchilo’, ts’o’okole’ tu je’ek’abtaj u joolnajilo’ob le winalil máaniko’, tu kaajil Chengdú, leti’ u noj kaajil u múuch’kajtalil Sichuán, lu’um tu’ux kaja’an le jach k’ajóolta’an nukuch paanda’ob, ts’o’okole’ te’elo’ yaan xan Chow Chow, u jejeláasil peek’ ku yantalo’ob te’elo’ yéetel óoli’ je’ex juntúul paandáa xan, beey úuchik u chikpajal ti’ jump’éel cha’an jts’a’ab k’ajóoltbil tumen u kúuchil Hongxing News.
U yuumil le kúuchile’, chéen k’ajóolta’an tumen u chuuka’anil u k’aaba’, Huang, ts’o’okole’ tu tsikbaltaj ti’ Hongxing Newse’, ts’o’ok bin u káajsik u beetik uláak’ jump’éel meyaj ti’al aalak’ ku biinsalo’obi’, tumen jach ma’alo’ob bin úuchik u k’a’amal perros panda tumen máax ku bino’ob te’e kúuchilo’.
“Lalaj u téen k boonik juntúul peek’e’ ku yantal u bo’ota’al mil 500 yuanes (211 dólares)", beey tu tsikbaltaj Huang. “U boonile’ ko’ojili’ u jóok’ol”. Tu ya’alaj xane’ k’a’abéet máax kaambanaja’an ti’al u beetik tu beel, ts’o’okole’ ti’al u bo’onol juntúul Chow Chow peek’e’ unaj bul k’iin táan u meyaj máak, tumen piim u tso’otsel.
Beey túuno’, u jaaxtajil "Teñir un perro en panda por mil 500 yuanes" ts’o’ok u seen k’i’itpajal maanal ti’ 170 miillonesil u téenal ichil u kúuchil Weibo, u keetil Twitter tu lu’umil China, ba’ale’ kex beyo’ yaan máako’ob ma’ uts u yilko’ob u beetiko’ob le ba’al yéetel u yaalak’o’obe’, tumen ku ya’aliko’ob yaan k’aasil ba’al je’el u yúuchul tu wíinkilalo’ob le ken bo’onok.
Jbéeterinario Li Daibinge’ tu ya’alaj ti’ Hongxing News “je’el u k’astal u tso’otsel u poolo’ob peek’o’obe’ yéetel je’el u yúuchul loobil ti’ u yoot’elo’obi”:
