Afp
Boonil
K'iintsil
Lunes 18 ti' noviembre, 2019
Estados Unidos.
Ka’ap’éel boono’ob ti’alinta’an tumen fráanses múuch’il Obviouse’, beeta’ab yéetel u yáantajil ba’ax k’ajóolta’an beey íinteligeencia áartifisiaal, ko’on le viernes máaniko’ tumen Sotheby's, jump’éel najil subaastáas, ba’ale’ le bajux bo’otab tu yóok’lalo’obe’ tu píitmáansaj le bajux tu tojoltaj jump’éel boon yáax beeta’ab léeyli’ tumen let múuch’ila’, úuchik u bo’ota’al 432 mil 500 dólares le ja’ab máaniko’.
[i]La Baronne de Belamy[/i], jump’éel boon táaka’an léeyli’ ichil u múuch’il meyaj [i]Portrait d'Edmond de Belamy[/i], ka’aj ko’on le u ts’ooka’, bo’ota’ab 60 u téenel u asab ko’ojil ti’ le bajux tukulta’an u tojol ka’achij, úuchik u k’a’aytal xan léeyli’ tumen subaastáas Christie's, ba’ale’ le yáax meyaj k ch’a’achibtiko’, tu tojoltaj 20 mil dólares, yéetel bo’ota’ab tumen juntúulili’ máak tu ya’alaj u k’áatij. Le bajux ko’one’ jach leti’ u p’íit taak’inil tukulta’an je’el u ts’a’abal tu yóok’lale’, tumen tukulta’an ka’ache’ je’el u ts’a’abal tak 30 mil dólares tu yóok’lal.
Tak yéetel bajux bo’ota’ab tumen kóomisiono’ob yéetel taasao’obe’ chéen 25 mil dólares bo’ota’ab tu yóok’lal le boono’.
Uláak’ jump’éel boonil, Katsuwaka of the Dawn Lagoon, ch’a’ab u yóol ti’ ba’ax suuk u yila’al ichil u japonesail kaajilo’ob, ba’ale’ le boona’ tu píitmáansaj le bajux tukulta’an ken u tojolt ka’achij, 12 mil dólares, tumen bo’ota’ab 16 mil 250 dólares, oka’an tak taasas yéetel kóomisiono’ob.
