Europa Press
Oochel Ap
K'iintsil
Martes 12 ti' noviembre, 2019
Máax táan ka’ach u beetik u jala’achil u noj lu’umil Bolivia, Evo Moralese’, tu beetaj óoficial le lunes máanika’, ba’ax ts’o’okili’ u yáax k’a’aytik le domingo máaniko’, tu’ux tu ya’alaje’ yaan u ch’éenel u beetik u jala’achil, ba’ale’ le je’elo’ tu jets’aj bin tumen “yanchaj u beetik” úuchak u beeta’al “goolpée politikóo, siivikóo yéetel póolisial”.
“Yáax máasewal ja’alachile’ táan u ts’o’okol beja’e’, tu súutukil táan u beeta’al in p’atik U Jala’chil Estado Plurinacional de Bolivia, úuchak u beeta’al goolpée politikóo, siivikóo yéetel póolisial”, ts’íibta’ab ti’ jump’éel k’a’aytajil ts’íib jts’a’ab k’ajóoltbil ti’ u bóolibianoil pik’il ju’unil Página Siete.
Moralese’ tu ya’alaj ba’ax “najmal u beetik” beey “máasewal jala’achil yéetel beey u jala’achil u kajnáalilo’ob Boliviae’”, leti’ “ka xu’uluk u ch’a’apachta’al yéetel u chukpachta’al” máaxo’ob t’u’ulpachtik ba’ax ku beetik, ka’alikile’ tu ch’a’achibtaj máasewal máako’ob yéetel máaxo’ob jo’olbesik políitikóo múuch’kabil Movimiento Al Socialismo (MAS).
“Walkila’, (...) aj meyajo’ob, aymara’ob, quechuao’ob yéetel máasewal máako’ob kaja’ano’ob tierras bajase’ t káajs k xíimbalt jump’éel chowak bej ti’al ma’ k sa’atal yéetel ti’al k ba’atel yóok’lal ba’ax béeyksa’ab ka’alikil yáax yanchaj máasewal jala’ach”, tu ya’alaj.
“Bejla’e’, u k’iinil k múul áantikbáaj ichilo’on, sáamale’ u jeel k’iin ti’al k jeel tukultik ba’ax yéetel bix ken k ch’a’ajo’olt ba’ax ku taal u k’iin tumen ma’ táan u xuul k ba’atel yóok’lal ba’ax k k’áat chéen tumen táan u yúuchul le ba’alo’oba’. U noj ba’alile’ leti’ ka p’áatako’ob tak tu paachil k’iin, ti’al ka ba’atenako’ob yóok’lal k lu’umil”, tu tsikbaltaj.
Ichil ba’ax j ts’a’ab k’ajóoltbil tumen u kúuchil k’a’aytajil péektsilo’ob, Reuterse’, ts’íib tu túuxtaj ti’al u k’a’aytik ba’ax bíin úuchuke’, ts’íibta’ab tu k’iinil 10 ti’ noviembre, Trópico de Cochabamba, yéetel k’ujsa’ab tak Asamblea Legislativa, ti’al ka páatak u je’ets’el jaaj ba’ax ku ya’alik.
Ti’al túun u k’iinil lunese’, Moralese’ tu ts’íibtaj ti’ Twitter “ka yanak u yóol máak ti’al ka beeta’ak u je’ets’el kaaj yéetel ti’al ka utsil yanak políitikóo ba’al, beyxan ti’al ka utsil yanak kaaj”.
Máax táan ka’ach u beetik u jala’achile’ tu yilaj le jejeláas yáax x wo’okinilo’ob yanchaj úuchik u jóok’ol, tóoka’ab u kúuchil Palacio. Beyxan tu noj kaajilo’ob La Paz yéetel El Altoe’ ts’o’ok xan u yantal uláak’ x wo’okinilo’ob. Ti’ le ts’ook 21 k’iino’oba’ tu’ux ts’o’ok u yantal talamilo’ob te’e lu’umo’, ts’o’ok u kíimil kex óoxtúul máako’ob yéetel uláak’o’obe’ ucha’an wa ba’ax loobil ti’ob.
