de

del

Mariana Norandi
Oochel Web messicirque.com
K'iintsil

Lunes 11 ti' noviembre, 2019
Barcelona, España.

Máaxo’ob uts tu yich báaxal boláa yéetel máaxo’ob t’u’ulpachtik Leo Messie’ yaan u páajtal u cha’antiko’ob u noj ba’alil áargentinoil jbáaxalil ti’ u kúuchil Camp Nou, yéetel xan ichil u “estaadyóoil” Cirque du Soleil, úuchak u beeta’al u cha’anil [i]Messi10[/i]. Parc del Fórum yaan tu noj kaajil Barcelonae’, yaan u wulabtik tak tu k’iinil 4 ti’ enero, ts’ook meyajil beeta’an tumen le káanadienseil mola’ayila’. Cha’ane’ ts’íibta’ab yéetel jo’olbesa’ab tumen koreográafo Mukhtar O.S., u yóolil cha’ane’ ch’a’aban ti’ u kuxtal jdéelanteeróo. Cha’an beeta’abe’ ma’alo’ob táan u bin u k’a’amal. Beyxan le jueves máanika’ u pláataformail [i]Rakuten TV[/i] tu ts’áaj k’ajóoltbil u cha’anil MessiCirque, jo’olbesa’an tumen Agustina Macri, tu’ux ku páajtal u yila’al bix úuchik u beeta’an le cha’ano’ yéetel bix úuchik u yúuchil premiere k’iimbesa’ab 10 ti’ octubre máaniko’.

Le túumben meyaja’, je’el u páajtal u cha’antal tumen je’el máaxake’. Jump’éel chíimpolal ti’al Messi, tu’ux k’a’abéetkunsa’ab u péeksajil wíinkilal yéetel its’at ti’al u ye’esal u yóol kóochak’ wóolis xa’ak’tan yéetel siirkóo, je’el bix xan ti’al u chikbesa’al u muuk’ yéetel u ki’ óolal u múul beeta’al jump’éel noj meyaj ti’al ka páata’ak u jóok’siko’ob 10. $7 u túul aj its’ato’obe’ ku ye’esiko’ob ichil u yáalkabil 90 minutose’, bix u yúuchul báaxal ichil jump’éel nojoch kaampóo; u nook’ilo’ob, u chíikulalo’ob, u kúuchil ti’al u cha’antal, beyxan u kúuchil tu’ux u yantal máaxo’ob ts’íibtiko’ob péektsilo’obe’, ku wóolméek’tiko’ob máak ti’al u yu’ubal beey jach táan u cha’antiko’ob báaxal. Lalaj síit ti’ trampolín, lalaj péek ku yúuchul yéetel u yáantajil k’áan wa suume’ ku beetik u náachtal u tuukul máak. U jats’utsil u báaxal Messie’ ichil jump’éel kaanchae’ ku chikpajal ichil le cha’anil siirkoa’, tu’ux ku páajtal u yila’al máalabares suuk u beeta’al, beeyxan kóontorsioniista’ob, ba’ale’ beyxan yaan uláak’ túumben ba’alo’ob ku k’a’abéetkunsa’al ti’al u chikbesa’al u ki’ichkelem ba’alo’ob.

Cha’ane’ ku chikbesik u ki’imak óolalil báaxal, ba’ale’ beyxan keet óol ti’al u yila’al máax ku loots’, yéetel ma’atech u p’atik paachil u jak’be’en óolil u cha’antal siirkóo. Beey túuno’, ku chikbesa’al bix u kokocha’abta’al wóolis… ku máan tu poolo’ob, tu keléembalo’ob, tu tseemo’ob, tu yooko’ob tuláakal máax ku táakpajali’, tak le ken k’ujsa’ak ichil póorteria.
Gooooool. Te’e súutuko’ ku kíilbal kaampóo, máaxo’ob cha’antike’ ku nup’ik u t’aano’ob ti’ ba’ax ku cha’antiko’ob, Meeeeeessi, Meeeeeessi… Te’elo’, ku ch’a’ak u muuk’ u yóol áargentinoil jbáaxal, ka’alikil u ye’esal yéetel kóomkom cha’ano’obe’ u kóokotsaj báaxal Messi ichil kaampóo yéetel uláak’ oochelo’ob beeta’ab jach chéen u ti’al u ye’esal ti’ le cha’ana’.
Le ken k’uchuk tu k’iin u líik’sa’al cha’an ti’ u kaajil Barcelonae’ yaan u káajsa’al u líiksa’al ti’al u wulabta’al tumen uláak’ noj lu’umil: Argentina. Messi10 yaan u k’uchul Buenos Aires tu winalil junio.