de

del

Notimex
Oochelo'ob Agencias
K'iintsil

Ciudad de México
Martes 29 de octubre, 2019

Eugenio Caballero, juntúul director de artee’, k’ube’entan ti’ ka’aj u líik’s tuka’atéen u yúuchben kaajil Tenochtitlán yéetel u nojba’alil mexica kaajil yanchaj tu ja’abil 1519, ti’al ka páatak u beeta’al jump’éel túumben ja’ajats cha’anil, serie, yóok’lal bix úuchik u yúuchul Conquista tu k’ab Hernán Cortés.

Le ja’ajats cha’anila’ yaan u múul beeta’al tumen Amazon Studios, Diego Luna yéetel Gael García (La Corriente del Golfo), beyxan Steven Spielberg (Amblin Television), Steven Zaillian, Darryl Frank yéetel Justin Falvey, ts’o’okole’ yaan u jo’olbesa’al tumen colombianoil Ciro Guerra yéetel yaan u táakpajal Javier Bardem.

“Le meyajila’ yaan u beeta’al tu noj lu’umil México, ts’o’okole’ je’el bix yaan u jo’olbeas’al tumen Ciroe’, yaan u tákapajal u yatan Cristina Gallego, ti’al xan u jo’olbesajili’. Jump’éel u cha’anil ficción yóok’lal bix úuchik u yantal Ciudad de México yéetel u ch’i’ibalil klu’umil, k’a’anan u kjeel tsikbaltik bix úuchik u yúuchul Conquista”, beey tu tsikbaltaj Caballero, máax tu beetaj u juradoil úuchik u beeta’al u 17 u téenal Festival Internacional de Cine de Morelia (FICM).

Tu tsikbaltaje’, óoli’ beey jump’éel “nojoch cha’an” wa jump’éel chan ja’ajats cha’anil yaan u yantal kamp’éel u jaatsilo’ob ts’íibta’an tumen Steven Zaillian (La Lista de Schindler), ba’ale’ u yóol ts’íibe’ yaan u jóok’sa’al ti’ Moctezuma, jump’éel ts’íib beeta’ab tumen aanimáas Dalton Trumbo.

“Ki’imak in wóol le ken in meyajt dirección de arte. Tumen yéetele’ ku páajtal in we’esik ba’ax kin tukultik. Uts tin wich in beetik túumben ba’alo’ob ma’ in wojel in beeti’, ba’ale’ láayli’ ichil u meyajil diseño”, beey tu tsikbaltaj Caballero.

Máax chíimpolta’ab yéetel Oscar tu ja’abil 2007 ichil u jaatsil Mejor Dirección Artística, yóok’lal u cha’anil El laberinto del fauno, beeta’ab jo’olbesa’ab tumen Guillermo del Toroe’, tu ya’alaj ja’ajats cha’ane’ yaan u beeta’al ti’al u k’iimbesa’al 500 ja’abo’ob úuchuk Conquista de México, ts’o’okole’ yaan u táakpajal méekixanoil ajbeet balts’amo’ob.

“Tu juunal ku yúuchul ba’al. Ku k’uchul u k’iinil u núup’ul tsikbalo’ob yóok’lal ba’alo’ob k’a’anan u ti’al máak, ts’o’okole’, le je’ela’ jump’éel ba’al yaan u yil yéetel u chukik 500 ja’abo’ob k’uchuk sak wíiniko’ob”.

U ts’íibil Trumboe’ tu beetaj ichil u deekadáail u ja’abilo’ob 60. Tu káakbale’ tukulta’ab ka’aj beeta’ak u noj meyajil balts’am tumen Kirk Douglas.