Notimex
Oochel
K'iintsil
Ciudad de México.
Viernes 25 ti' octubre, 2019
Coca-Cola, PepsiCo yéetel Nestlée’ leti’e’ mola’ayo’ob jo’olbesik tu ka’atéen le lajunp’éel kúuchilo’ob yaan yóok’ol kaab táan u asab beetiko’ob k’aas ti’ yóok’ol kaab yóok’lal plástico ku jóok’siko’ob, le beetike’, unaj xan u beetiko’ob uláak’ ya’abach yéetel noj meyajo’ob ti’al u súutukil táan u máan u molko’ob ba’al ma’atech u k’a’abéetkunsa’al, beey a’alab le miércoles máanika’ tumen u múuch’kabil Greenpeace.
Jo’olbesa’ano’ob tumen u nuup’ medioambientalistail meyajil Break Free From Plastice’, beeta’ab jump’éel nu’ukbesaj tumen maanal ti’ 70 mil máako’ob ti’al u jóok’sa’al sojol yéetel ba’alo’ob ma’ unaj u yantal ichil k’áak’náab yéetel u beelil u yáalkab ja’, le meyaja’ beeta’ab tuláakal yóok’ol kaab yéetel mu’uch’ óoli’ táanchúumuk millónil plástico ba’alo’ob, u ya’abile’ leti’ le ku beeta’al tumen le óoxp’éel mola’ayo’obo’.
U nu’ukbesajil Día Mundial de la Limpieza beeta’ab tu winalil septiembre tumen máako’ob taak u yáantiko’ob yóok’ol kaab, kaja’ano’ob ti’ 51 u p’éel noj lu’umo’ob, tu’ux xíimbalta’ab 484 u p’éel líik’saj meyajil, auditoria, ti’ le mola’ayoba’ ti’al beyo’ u yila’al máakalmáak ti’ le je’elo’obo’ yaan u si’ipil yóok’lal le seten ba’alo’ob ku jóok’sa’al pulbil.
Coca-Colae’ u ka’atéen ja’aba’ p’aatal ichil máaxo’ob seten k’askúunsik ba’al yéetel plástcio, tumen ku yantal 11 mil 732 nu’ukulo’ob, tu paache’ ti’ yaan PepsiCo, Nestlé, Mondelez International, Unilever, Mars, P&G, Colgat-Palmolive, Phillip Morris yéetel Perfetti Van Melle, beey úuchik u ts’a’abal k’ajóoltbil tumen Greenpeace Filipinas.
"Ya’abach mola’ayo’obe’ ts’o’ok u éejentiko’ob u beetiko’ob uláak’ meyajo’ob ti’al u yáantajo’ob le ken jo’op’ok u koobolo’ob, ba’ale’ u ya’abile’ láayli’ u kaláantik u yúuchbenil u beeta’al koonol yéetel desechable", beey tu ya’alaj Greenpeace.
Asiáatikoil lu’umo’ob je’el bix China, Indonesia, Filipinas, Vietnam yéetel Sri Lanka ku pulko’ob u ya’abil u pláastkoilo’ob ti’ k’áak’náab, ba’ale’ “u jaajile’ ya’abach ti’ le k’aasil ku beeta’al Asia yóok’lal pláastiko’e’ ku yantal yóok’lal nojoch mola’ayo’ob ti’ yano’ob Europa yéetel Estados Unidos", ts’íitba’ab.
Beyxan ku ya’alik mola’ayo’obe’ ku ya’aliko’ob ku beetiko’ob meyajo’ob ti’al u jeel k’a’abéetkunsiko’ob nu’ukulo’ob, ba’ale’ ma’ jaaji’, ts’o’okole’ ma’ unaj chéen leti’e ba’ax ku beeta’al ti’al u chan ch’éensa’al u yantal sojol.
